Шавкат Мирзиёев Путинни Россия куни муносабати билан табриклади
Ўзбекистон Президенти Шавкат Мирзиёев Россия куни муносабати билан Россия Президенти Владимир Путинга табрик йўллаб, икки мамлакат ўртасидаги стратегик шериклик ва кўп қиррали ҳамкорлик муносабатларини янада мустаҳкамлаш муҳимлигини таъкидлади.
Ўзбекистон Президенти Шавкат Мирзиёев Россия Президенти Владимир Путин ва Россия халқини миллий байрам — Россия куни муносабати билан табриклади.
Давлат раҳбарининг табрик мактубида ушбу сана рус халқининг бой маънавий мероси, миллий қадриятлари ҳамда мамлакатнинг барқарор тараққиётга интилишини ўзида мужассам этгани қайд этилган.
Мактубда Ўзбекистон ва Россия ўртасидаги муносабатлар сўнгги йилларда изчил ривожланаётгани, савдо-иқтисодий, ҳудудлараро ва гуманитар соҳалардаги ҳамкорлик янги босқичга кўтарилаётгани таъкидланган.
Шунингдек, яқинда Санкт-Петербург шаҳрида бўлиб ўтган олий даражадаги музокаралар икки давлат ўртасидаги анъанавий дўстлик ва ўзаро ишонч муносабатларининг мустаҳкам эканини яна бир бор тасдиқлагани қайд этилган.
«Ишонаманки, эришилган келишувлар Ўзбекистон ва Россия ўртасидаги дўстлик ва ўзаро манфаатли ҳамкорлик муносабатларини янада чуқурлаштириш, мамлакатларимиз ва халқларимиз фаровонлиги йўлида кўп қиррали шерикликнинг улкан салоҳиятини рўёбга чиқариш учун мустаҳкам асос бўлиб хизмат қилади», дейилади табрик хатида.
