Таиланд Камбоджа ҳудудига ҳаво зарбалари йўллади
Таиланд Камбоджа чегарасидаги таиландлик ҳарбий ҳалок бўлган ҳужумдан сўнг Таиланд Камбоджа ҳудудидаги бир неча ҳарбий объектларга ҳаводан зарба берди.
Таиланд армияси Камбоджа ҳудудидаги бир неча «ҳарбий объектлар»га ҳаво зарбалари берди. Армия расмийси Винтай Суварининг маълум қилишича, зарбалар асосан инфратузилма, қурол-аслаҳа омборлари, бошқарув пунктлари ва логистика йўналишларини нишонга олган. Бу ҳаракат Камбоджа ҳарбийлари томонидан Таиланднинг Убонратчатхани провинциясида тай қўшинларига ўт очилгани ортидан амалга оширилган. Ҳужум натижасида бир ҳарбий ҳалок бўлиб, яна тўрт киши яралангани билдирилган.
Ҳукумат чегарага яқин ҳудудларда хавф ортганини эътироф этмоқда. Расмий маълумотларга кўра, Таиланд тўртта туманидан 385 мингдан ортиқ аҳоли эвакуация қилинмоқда, уларнинг 35 мингдан зиёди аллақачон вақтинчалик масканларга жойлаштирилган. Айни пайтда вазиятнинг янада кескинлашиши мумкинлиги ҳақида огоҳлантирилмоқда.
Камбоджа эса Таиландни Преах-Вихеар ва Оддармеантей провинцияларида унинг қўшинлари устидан ҳужумлар уюштирганликда айбламоқда. Камбоджа мудофаа вазирлиги вакили тай қўшинлари танклардан фойдаланиб ибодатхоналарни ҳам ўққа тутганини, бироқ Камбоджа жавоб ўти очмаганини таъкидлади. Бу айбловлар тарафлар ўртасидаги ишончни янада сусайтирди.
Икки давлат ўртасидаги чегара можароси бир асрдан буён тўхтамасдан давом этаётгани маълум. Низонинг марказида Прэахвихеа ибодатхонаси ҳамда «Яшил учбурчак» деб аталувчи ҳудуд мавжуд бўлиб, колониявий даврдан қолган ноаниқ чегара чизиқлари можарони чуқурлаштириб келмоқда. Йил давомида бир неча марта кескинлашган вазият бу гал яна янги босқичга ўтди.
Ёз ойларида — чегаранинг шимолий қисмида юз берган тўқнашувлар Паттайя яқинигача етган, беш кун давом этган жангларда камида 43 киши ҳалок бўлган, 300 мингга яқин аҳоли қочқинга айланган эди. Оташкесимга эришиш учун АҚШ президенти Доналд Трамп ҳам аралашган, октябр ойига келиб тарафлар АҚШ воситачилигида тинчлик келишувини имзолаганди. Бироқ Таиланд яқинда чегара яқинида мина портлаши сабаб икки ҳарбий яраланганини билдиргач, ушбу келишувни амалга оширишни тўхтатиб қўйди.
