Теҳрон аэропортида кучли портлашлар содир бўлди
Ўтган тун Теҳронда уруш бошланганидан буён энг кучли ҳаво зарбалари кузатилиб, улар бир неча соат оралиқда такрорланмоқда.
Теҳроннинг йирик тижорий аэропортларидан бирида кучли портлашлар содир бўлди. Гувоҳларнинг айтишича, ҳодиса пайтида учиш-қўниш йўлагида самолёт ёнгани кўрилган. Бу воқеа Исроил Эрон ҳудудига қарши янги зарбалар тўлқинини бошлаганини маълум қилганидан кейин юз берган.
Теҳрон аҳолиси BBC Persian хизматига берган маълумотларга кўра, сўнгги тун ҳозиргача энг оғир кечган. Айтилишича, ҳаво зарбалари ҳар бир неча соатда такрорланиб, шаҳар атрофида бир неча портлаш овозлари эшитилган.
Эрон билан ғеч қандай келишув бўлмайди
Шу билан бирга, АҚШ президенти Доналд Трамп Эрон билан ҳеч қандай келишув бўлмаслигини билдирган. Унинг таъкидлашича, фақат «шартсиз таслим бўлиш» вариантигина мавжуд бўлиб, бундай ҳолатда Эрон АҚШ маъмуриятига мақбул бўлган янги етакчини танлаши керак.
Россиянинг Эронни қўллаб-қувватлаётгани ҳақидаги хабарлар юзасидан АҚШ мудофаа вазири Пит Хегсет изоҳ берди. У CBS News телеканалига берган интервюсида Доналд Трамп кимлар ўзаро музокара олиб бораётганини «жуда яхши билишини» таъкидлади.
Ливанда ҳалок бўлганлар
Минтақадаги кескинлик Ливанга ҳам таъсир кўрсатмоқда. Ливан соғлиқни сақлаш вазирлиги маълумотига кўра, Исроил зарбалари бошланганидан буён 217 киши ҳалок бўлган. Байрут шаҳрида ҳам кучли портлашлар кузатилгани хабар қилинмоқда.
Айни пайтда Буюк Британия ташқи ишлар вазирлиги минтақада қолиб кетган фуқароларни эвакуация қилиш ишларини бошлаган. Маълум қилинишича, иккинчи чартер рейси Уммондан учиб кетган бўлиб, у ердаги британ фуқароларини хавфсиз ҳудудга олиб чиқиш режалаштирилган.
