Тошкентда бир кунда 22 та ЙТҲ содир бўлди

4-сентябр куни Тошкент шаҳрида жами 22 та йўл-транспорт ҳодисаси содир бўлди. Ҳодисалар оқибатида 4 нафар фуқаро оғир тан жароҳати олган.

Йўл ҳаракатини ташкил этиш маркази маълумотларига кўра, шу куни пойтахт йўлларида 4 751 та йўл ҳаракати қоидаси бузилиши қайд этилган.

Сутка давомида Тошкент кўчаларида 1 502 057 та транспорт воситаси ҳаракатланган. Бу 3-сентябрдаги кўрсаткичдан 14 807 тага, яъни 1 фоизга кўп.

Транспорт оқими ортди

4-сентябр куни жамоат транспорти 170 та йўналишда ишлаган. 1 670 та автобус орқали 1 228 158 нафар йўловчи ташилган.

Шу куни Тошкент метрополитени ҳам 862 053 нафар йўловчига хизмат кўрсатган. Бу кўрсаткич пойтахтда жамоат транспортига бўлган талаб юқори эканини кўрсатади.

Тиғиз вақтларда 6 та чорраҳада тирбандлик даражаси 7 баллга етган. Яна бир чорраҳада эса тирбандлик 7 баллдан ошган. Муаммоли нуқталарда светофорларнинг иш режими ўзгартирилиб, айрим йўналишларда яшил сигнал вақти узайтирилган.

Тирбандликни барқарорлаштириш учун айрим чорраҳаларга ЙПХ ходимлари жалб қилинган. Марказ пойтахтдаги транспорт оқими ва тирбандлик ҳолатини реал вақт режимида кузатиб бормоқда.

Ҳаракат интенсивлиги ўзгаришига қараб светофорларнинг иш режимларига тезкор тузатишлар киритилмоқда. Бу транспорт оқимининг ортиқча тўпланишини камайтиришга қаратилган.

Аввалроқ, 2-сентябрь куни пойтахт кўчаларида транспорт оқими 24-августдаги одатий иш кунига нисбатан 30 фоизга ошгани хабар қилинганди. Шунга қарамай, шаҳар бўйича умумий тирбандлик даражаси 6 балл атрофида сақланган.