Трамп: «Ҳа, мен Ғазога бораман»
Доналд Трамп Ғазога бормоқчилиги ва минтақани қайта тиклаш билан шуғулланадиган янги халқаро ташкилотга раҳбарлик қилиш ниятини билдирди.
АҚШ президенти Доналд Трамп Ғазога бориш ниятида эканини маълум қилди. Бу ҳақда у «Time» журнали билан суҳбатда айтиб ўтди.
Эҳтимолий ташриф ҳақидаги саволга жавоб берар экан, Трамп шундай тасдиқлади: «Ҳа, бораман. Биласизми, бизда Тинчлик кенгаши бор ва у аллақачон ташкил этилган. Мендан унинг раиси бўлишимни сўрашди. Ишонинг, мен буни унчалик хоҳламагандим, лекин Тинчлик кенгаши жуда таъсирли шахслардан иборат бўлиб, Яқин Шарқда катта таъсир кучига эга бўлади».
Трамп маъмурияти томонидан ишлаб чиқилган режага кўра, Ғазо технократик, носиёсий Фаластин қўмитасидан иборат вақтинчалик ўтиш даври ҳукумати томонидан бошқарилиши керак.
Ушбу қўмита таркибига малакали фаластинликлар ва халқаро экспертлар киради, унинг фаолиятини назорат қилишни эса янги халқаро орган — Трампнинг ўзи бошчилик қиладиган Тинчлик кенгаши зиммасига олади.
АҚШ президентининг махсус вакили Стив Уиткоффнинг сўзларига кўра, икки йиллик урушдан сўнг Ғазони тиклаш ва қайта қуриш тахминан 50 миллиард долларга тушиши мумкин.
Аввалроқ Трамп ўзининг ижтимоий тармоқларида сунъий интеллект ёрдамида яратилган видеороликни эълон қилган эди. Унда у Ғазонинг тикланишидан кейинги келажагини тасвирлаган.
Европа Иттифоқи, ўз навбатида, АҚШ президентининг тинчлик режасига мувофиқ ҲАМАС ҳаракатининг қуролсизланишига кўмаклашиш учун молиявий ва техник ёрдам кўрсатиш имкониятини кўриб чиқмоқда.
