Трамп Россия ва Украина келишувга эришганини эълон қилди

АҚШ президенти Украинанинг Россия энергетика объектларига зарба бермасликка рози бўлганини маълум қилди. Россия ҳам Украинага нисбатан худди шундай йўл тутиши келишиб олинган. Доналд Трамп бу ҳақда ўзининг «Truth Social» ижтимоий тармоғида ёзди.

Америка президентининг баёноти ҳозирча Москва ва Киев томонидан расман тасдиқланмади. Шу сабабли келишувнинг қачон кучга кириши, қанча муддат амал қилиши ва қайси объектларга татбиқ этилиши номаълум.

Трамп дунёда дизел ёқилғиси нархининг ўсишида асосий омил Россия–Украина уруши эканини таъкидлади. У бу ўсишни Эрон атрофидаги вазият билан боғлаш тўғри эмаслигини билдирди.

Дизел муаммоси

Трампнинг бу позицияси 13 сентябрдаги баёнотларидан кейин янгради. Унда у Украина президенти Володимир Зеленскийни Россиядаги дизел ёқилғиси захиралари ва ишлаб чиқариш объектларига зарба беришни тўхтатишга чақирди.

«Жаноб Володимир Зеленский фақат бир ишни қилиши керак. У Россиядаги дизел ёқилғиси захираларини йўқ қилишни бас қилиши лозим. У дизел танқислигини келтириб чиқармоқда», — деди Трамп.

Сўнгги ойларда Украина Россиянинг нефтни қайта ишлаш заводлари ва бошқа энергетика объектларига узоқ масофали дронлар орқали зарбалар бериб келмоқда. Киев бундай объектларни Россия ҳарбий машинасини молиялаштирувчи муҳим инфратузилма сифатида кўради.

Музокаралар фонида

8 сентябр куни Трамп Россия Федерацияси президенти Владимир Путин билан суҳбатлашди

9 сентябр куни Трамп Путин тинчлик келишувига тайёр эканини айтди ва Зеленский ҳам бундай келишувга рози бўлишидан умид билдирди.

Бироқ ҳозирча энергетика объектларига зарба беришни тўхтатиш бўйича айтилган келишувнинг аниқ шартлари ва амал қилиш механизми маълум эмас.