Трамп ёнғинлар тутуни учун Канадага қўшимча бож жорий қилмоқчи

АҚШ Президенти Доналд Трамп Канададаги ўрмон ёнғинлари оқибатида ҳосил бўлган тутун АҚШ ҳудудига тарқалаётгани учун Оттавани қаттиқ танқид қилди. Унинг фикрича, бу ҳолат мамлакатга экологик ва иқтисодий зарар етказмоқда.

Трамп Truth Social ижтимоий тармоғида Канада ўз ўрмонларини самарали бошқармаётганини таъкидлаб, буни «умуман қабул қилиб бўлмайдиган» вазият деб атади. У Канада Бош вазири Марк Карнига қўнғироқ қилиб, муаммони ҳал этиш бўйича қандай чоралар кўрилишини сўрашини маълум қилди.

АҚШ президентининг таъкидлашича, «қасддан қилинган бепарволик» туфайли АҚШ ҳар йили миллиардлаб доллар зарар кўрмоқда. Шу муносабат билан у ҳаво ифлосланишининг иқтисодий харажатлари Канада товарларига нисбатан амал қилаётган мавжуд тарифларга қўшилиши кераклигини билдирди.

Канада жавоби

Канаданинг Фавқулодда вазиятлар ва жамоалар барқарорлиги вазири Элеанор Олшевски мамлакат ҳукумати 2020 йилдан буён ўрмонларни муҳофаза қилиш ва ёнғинларнинг олдини олишга 12 миллиард Канада доллари йўналтирганини маълум қилди.

Унинг сўзларига кўра, АҚШ ва Канада ўртасида ўрмон ёнғинларига қарши курашиш бўйича кўп йиллик ҳамкорлик мавжуд. Ҳозирги асосий вазифа эса канадаликлар хавфсизлигини таъминлаш ҳисобланади.

Марк Карни идораси Трампнинг баёнотларига ҳозирча расмий муносабат билдирмаган. Шу билан бирга, икки давлат раҳбарининг 20-июл куни Ню-Жерсида футбол бўйича Жаҳон чемпионати финали доирасида учрашиши кутилмоқда.

Ёнғинлар кенгаймоқда

Жорий йилда Канададаги йирик ёнғинлар асосан Онтарио вилоятининг шимоли-ғарбий қисмида кузатилмоқда. Ҳозиргача қарийб 650 минг акр, яъни 2 630 квадрат километр ҳудуд ёниб кетган. Бу ўтган йилнинг шу давридаги кўрсаткичдан юқори. Минглаб одамлар эвакуация қилинган.

Мутахассислар глобал иқлим исиши ўрмонларнинг қуриши ва йирик ёнғинлар сони ортишига сабаб бўлаётганини таъкидламоқда. Шу билан бирга, АҚШнинг ўзида ҳам вазият оғирлигича қолмоқда. Миллий идоралараро ёнғин маркази маълумотига кўра, 2026 йил бошидан буён мамлакатда 3,7 миллион акр ер майдони ёнган. Бу сўнгги ўн йиллик ўртача 2,7 миллион акрлик кўрсаткичдан анча юқори.