Украина Озарбойжон билан бирга қурол ишлаб чиқаради

Боку Украинанинг ҳудудий яхлитлигини қўллаб-қувватлайди, дея баёнот берди Озарбойжон президенти Илҳом Алиев украиналик мавқедоши Володимир Зеленский билан учрашувдан кейинги матбуот анжуманида.

«Озарбойжон ва Украина ўз давлатларининг суверенитети ва ҳудудий яхлитлигини барча халқаро ташкилотларда қўллаб-қувватлаган ва қўллаб-қувватлашда давом этади», – деди Алиев.

Шунингдек, у Зеленский билан «ҳарбий-техник ҳамкорлик бўйича фикр алмашилгани»ни ва бу йўналишда катта истиқболлар мавжудлигини айтди. Унинг сўзларига кўра, ҳар икки мамлакатда ҳарбий-саноат комплекси ривожланмоқда ва ушбу соҳада қўшма украин-озарбойжон ишлаб чиқариш учун «катта имкониятлар» бор.

Володимир Зеленский эса «Telegram» саҳифасида «бугун Украина ва Озарбайжон турли соҳаларда олтита ҳужжат имзолаганини» маълум қилди.

«Асосийси – мудофаа-саноат комплекси. Биз ҳамкорлигимизни ривожлантирамиз ва уни чуқурлаштирамиз», – деди у.

Унинг қўшимча қилишича, қурол-яроғ ишлаб чиқариш «халқларимизга барқарорлик олиб келиши» ва эҳтимолий агрессорлар учун тийиб турувчи омилга айланиши мумкин. Лидерлар энергетика ва гуманитар йўналишлардаги ҳамкорликни ҳам муҳокама қилди.

Озарбойжонда музокара ўтказиш таклифи

Зеленский, шунингдек, Киев АҚШ–Украина–Россия форматдаги навбатдаги уч томонлама тинчлик музокараларини Озарбайжонда ўтказишга тайёр эканини билдирди, агар Россия ҳам «дипломатияни танласа».

«Украина учун Россиянинг бу адолатсиз урушни якунлашга куч топиши жуда муҳим. Албатта, биз ҳамкорларимизнинг воситачиликдаги ролини юқори баҳолаймиз… Биз уч томонлама музокараларга тайёрмиз. Бундай музокаралар Туркияда бўлган. Шунингдек, америкалик ҳамкорларимиз билан Швейцарияда ҳам ўтказилган», – деди Зеленский.

Икки давлат раҳбарининг учрашуви шанба куни Озарбайжоннинг Габала шаҳрида бўлиб ўтди. Томонлар энергетика, аграр сектор ва иқтисодий ҳамкорлик бўйича ҳукуматлараро комиссия фаолиятини кенгайтириш масалаларини ҳам муҳокама қилди.