Вашингтонда банкет зали қурилиши муносабати билан Оқ уйнинг бир қисми бузилмоқда

20 октябр куни Вашингтонда Оқ уйнинг шарқий қаноти бузиш ишлари бошланди. Бу ерда президент Доналд Трамп ўзининг янги лойиҳаси — улкан банкет залини қуришни режалаштирган. АҚШ президентининг таъкидлашича, янги иншоот 8400 метр квадрат майдонни эгаллайди ва «дунёдаги энг чиройли заллардан бири»га айланади.

Трампнинг илҳом манбаи — унинг Флоридадаги шахсий Мар-а-Лаго резиденцияси, у ерда ҳам деворлари сусал тилла билан безатилган банкет зали мавжуд. Президентнинг айтишича, Оқ уйдаги ҳозирги зал фақат 200 кишига мўлжалланган ва бу «жуда кичик». Янги зал эса 1000 нафар меҳмонни қабул қила олади.

«Бизда феноменал банкет зали бўлади — дунёдаги энг гўзалларидан бири. У бутунлай шишадан бўлади, лекин Оқ уйнинг ранги ва шаклига мос равишда тайёрланади», — деди Трамп журналистларга.

Шарқий қанот 1902 йилда қурилган бўлиб, илгари у ерда президент рафиқаларининг офислари жойлашган. 1942 йилда унга қўшимча қават қўшилган ва у архитектуранинг «марвариди» сифатида танилган. Энди эса мазкур қисм тубдан янгиланмоқда.

Трамп бу билан чекланиб қолмоқчи эмас. Президент Овал кабинетда тилла безаклар қўшиш, Розарий боғини қайта безатиш ва ҳатто Париждаги триумф аркасига ўхшаш ёдгорлик аркаси қуриш ниятида.

Журналистлардан бири «Бу ёдгорлик кимга бағишланади?» деб сўраганда, Трамп кулимсираб, «Албатта, менга-да», деб жавоб берган.