Хитой—Қирғизистон—Ўзбекистон темирйўлида 9 километрдан ортиқ туннел қазилди
Транспорт вазири Илҳом Маҳкамовнинг маълум қилишича, Хитой—Қирғизистон—Ўзбекистон темирйўли лойиҳаси доирасида туннеллар ва кўприклар қурилиши жадал суръатларда олиб борилмоқда.
© Foto: Qonunchilik palatasiХитой—Қирғизистон—Ўзбекистон орасида қурилаётган темирйўлда тўққиз километрдан ортиқ туннел қазилди. Бу ҳақда Ўзбекистон транспорт вазири Илҳом Маҳкамов 3-июн куни Олий Мажлис Қонунчилик палатасидаги чиқиши давомида маълум қилди.
Вазирнинг айтишича, мазкур лойиҳа доирасида 19 та станция, жумладан, иккита чегара станциялари ва битта юк ортиш-тушириш станциялари, шу билан бирга, 29 та туннел, 50 та кўприк қурилиши кўзда тутилган. Қирғизистон ҳудудида учта давлат улушидан иборат бўлган «Хитой—Қирғизистон—Ўзбекистон темирйўл компанияси» масъулияти чекланган жамияти ташкил этилган.
Қилинган ишлар
Билдирилишича, ҳозирда қурилиш ишларига 5 883 та махсус техника ва 9 000 нафардан зиёд ишчи жалб қилиниб, 25 та туннелда тўққиз километрдан ортиқ қазиш ишлари амалга оширилган.
«Рамали кўприклар қурилиши саккизта объектда бошланган бўлиб, бу лойиҳада назарда тутилган 33 та кўприкнинг 24 фоизини ташкил этади. Айни пайтда хандақ қазиш ва пойдеворларни тайёрлаш ишлари олиб борилмоқда», – деди вазир Маҳкамов.
Режа ва кутилаётган натижа
Транспорт вазирининг сщзларига кўра, мазкур стратегик лойиҳа 2030-йил якунига қадар қуриб битказилиши режалаштирилган. Лойиҳа тўлиқ қувватда ишга тушгач, юк ташишнинг ҳажми йилига 15 миллион тоннагача етиши ва товарлар етказиб бериш муддати ўртача етти кунга қисқариши кутилмоқда.
Лойиҳанинг бошланиши
Мазкур темирйўл ғояси илк бор 1996 йилда илгари сурилган бўлиб, шу вақтгача камида 18 та техник-иқтисодий асос ишлаб чиқилган. Лойиҳа мураккаб тоғли ҳудудлар, темирйўл изи стандартлари ва молиялаштириш масалалари сабаб узоқ йиллар давомида кечиктирилган.
2024 йил июн ойида уч давлат темирйўл қурилиши бўйича расмий битимни имзолаган. Шу йил 27 декабр куни қурилиш ишларига старт берилган эди. Президент Шавкат Мирзиёев ушбу лойиҳани «қарийб 30 йиллик саъй-ҳаракатлар натижаси бўлган тарихий воқеа» деб атаган.
Шунингдек, Қирғизистон президенти Садир Жапаровнинг маълум қилишича, Хитой–Қирғизистон–Ўзбекистон темир йўлининг ишга туширилиши тахминан 2030 йилга мўлжалланмоқда. 2030 йилда темирйўл орқали 8 миллион тонна юк ташиш кутилмоқда. Бу кўрсаткич 2040 йилга бориб 10 миллион, 2050 йилда эса 13,5 миллион тоннага етади. Қирғизистон ҳукумати лойиҳа 30–40 йил ичида ўзини тўлиқ қоплашини маълум қилган.
