«Хитойдан қўрқиш эмас, унинг имкониятларидан фойдаланиш керак» — эксперт
Хитойшунос олим Азизбек Нигманов Хитойнинг Ўзбекистондаги иқтисодий иштирокига хавф сифатида эмас, балки ўзаро манфаатли ҳамкорлик имконияти сифатида қараш кераклигини билдирди.
© Depositphotos / Ryzhov«Қурултой» подкастининг навбатдаги сонида Хитойнинг иқтисодий ривожланиши, Марказий Осиё билан муносабатлари ва минтақадаги манфаатлари муҳокама қилинди. Суҳбат давомида Халқаро Нордик университети доценти, иқтисодиёт фанлари бўйича фалсафа доктори Азизбек Нигманов Хитойнинг иқтисодий фаоллигига нисбатан билдирилаётган хавотирлар ҳақида ҳам фикр юритди.
Мутахассиснинг таъкидлашича, Хитой билан муносабатларда фақат бир томоннинг манфаатларини кўриш тўғри эмас. Хитой Ўзбекистон билан ҳамкорликдан иқтисодий фойда олишни кўзласа, Ўзбекистон ҳам ушбу алоқалардан ўз тараққиёти учун фойдаланиши мумкин.
«Хитойдан қўрқиш керак эмас. Яна қайтараман, Хитойдан фойдаланиш керак. Хитой биздан фойдаланяптими? Биз ҳам ундан фойдаланишимиз керак», — деди олим.
Нигмановнинг фикрича, Хитойнинг Марказий Осиёга қизиқиши тарихий илдизларга эга. Қадимда Буюк ипак йўли орқали шаклланган савдо-иқтисодий алоқалар бугунги кунда инвестициялар, инфратузилма ва транспорт лойиҳалари орқали давом этмоқда.
У Хитойнинг минтақага капитал билан кириб келаётганига эътибор қаратиб, бундай ҳамкорликни фақат бир томонлама манфаат сифатида баҳоламаслик кераклигини таъкидлади. «Биз фақат бир тарафни кўрмайлик-да», — деди мутахассис.
Суҳбатда Хитойнинг иқтисодий тараққиётига ҳам тўхталиб ўтилди. Олим 1978 йилдан бошланган иқтисодий ислоҳотлар, хорижий инвестицияларни жалб қилиш, ишлаб чиқаришни ривожлантириш ва таълимга эътибор қаратиш мамлакат тараққиётида муҳим ўрин тутганини қайд этди.
Унинг тушунтиришича, Хитой дастлаб бошқа давлатларнинг маҳсулотлари ва технологияларини ўрганиб, кейинчалик уларни мустақил ишлаб чиқариш ва жаҳон бозорига олиб чиқишга эътибор қаратган.
Мутахассис Хитой тажрибасидан фойдаланишда ҳамкорликнинг иқтисодий натижаларига эътибор бериш зарурлигини билдирди. Унинг фикрича, Ўзбекистон Хитой билан алоқаларни ривожлантириш орқали капитал, технология ва янги транспорт имкониятларидан манфаат олиши мумкин.
Нигманов Хитой билан муносабатларда қўрқувдан кўра амалий манфаатларга таяниш кераклигини таъкидлади.
