Хитойлик инвесторлар Ўзбекистонда эски шиналардан техник углерод ишлаб чиқаришни йўлга қўймоқчи

Хитой компаниялари Ўзбекистонда эски шиналарни утилизация қилиш, техник углерод ишлаб чиқариш ҳамда «яшил» энергетика соҳасидаги янги лойиҳаларни амалга ошириши мумкин. Бу ҳақда Инвестициялар, саноат ва савдо вазирлиги матбуот хизмати хабар берди.

Қайд этилишича, вазир ўринбосари Илзат Қосимов 19-март куни Хитойнинг «China CAMC Engineering» компаниясининг Ўзбекистондаги ваколатхонаси бош директори Го Цзицзе ва «Fushun Zhenxing Chemical Engineering» компанияси бош директори Пяо Сян билан учрашган.

Музокаралар давомида томонлар замонавий пиролиз технологияларини жорий этиш, экологик хавфсиз ишлаб чиқаришни ташкил этиш ҳамда саноат чиқиндиларини камайтириш учун илғор муҳандислик ечимларини қўллаш масалалари бўйича батафсил фикр алмашган.

Маълумот учун, «Fushun Zhenxing Chemical Engineering» — Хитойнинг Фушун шаҳридаги муҳандислик-технология компанияси бўлиб, у кимёвий инжиниринг, нефть-кимё ва экологик ечимлар соҳасида фаолият юритади. Компания бугунги кунгача техник углерод йўналишида 80 дан ортиқ лойиҳаларни амалга оширган.

«Яшил» энергетика соҳасидаги ҳамкорлик

Ўша куни Илзат Қосимов Хитойнинг йирик «Anhui Conch Group» холдинги таркибига кирувчи ҳамда қайта тикланувчи энергетикага ихтисослашган «Anhui Conch New Energy» компанияси вакиллари билан ҳам учрашган.

Учрашув давомида асосий эътибор инвестициявий ҳамкорликни кенгайтиришга қаратилган. Шунингдек, томонлар «Anhui Conch Group» холдинги томонидан республика ҳудудларида қурилиш материаллари ишлаб чиқариш бўйича амалга оширилаётган лойиҳаларнинг муваффақиятли натижаларини алоҳида қайд этган.

Маълумот учун, «Anhui Conch New Energy» — йирик «Anhui Conch Group» холдингининг таркибий бўлинмаси бўлиб, қайта тикланувчи энергетика соҳасига ихтисослашган. Компания бутун дунё бўйлаб 148 та электр станциясини қуриш тажрибасига ҳамда 159 та технологик патентдан иборат салмоқли портфелга эга.