Yevroittifoq Rossiyani pul «yuvish» xavfi yuqori bo‘lgan davlatlar ro‘yxatiga kiritmoqda
Yevropa Ittifoqi Rossiyani pul «yuvish» va terrorizmni moliyalash xavfi yuqori mamlakatlar ro‘yxatiga qo‘shmoqda. Bu banklar uchun qo‘shimcha tekshiruvlar va qat’iy moliyaviy nazorat talab qiladi.
Yevropa Ittifoqi Rossiyani pul «yuvish» xavfi yuqori davlatlar ro‘yxatiga kiritish bo‘yicha qaror qabul qilmoqda. Bu haqda «Politico» nashri ikki nafar YI rasmiysi tanishgan hujjatga asoslanib ma’lum qilmoqda.
Agar bu qaror qabul qilinsa, Yevropa moliyaviy muassasalari Rossiya bilan bog‘liq barcha operatsiyalarga nisbatan kuchaytirilgan due diligence tartiblarini qo‘llashi shart bo‘ladi. Banklar esa xavflarni yanada kamaytirish bo‘yicha qo‘shimcha choralar ko‘rishi talab etiladi.
Rossiya 2022 yildan keyin FATF a’zoligidan chetlatilgan bo‘lsa-da, uning qora ro‘yxatga kiritilishiga BRICS mamlakatlari — Braziliya, Hindiston, Xitoy va Janubiy Afrika Respublikasi qarshi chiqqan. Ukraina taqdim etgan dalillarga qaramay, FATF Rossiyani rasman «yuqori xavfli» mamlakat deb e’lon qilmagan. Yevroittifoq parlamenti esa Komissiyani bir necha bor FATF o‘rnini bosib, Rossiyani ro‘yxatga qo‘shishga chaqirgan.
Yevropa Komissiyasi bu baholashni 2025 yil oxirigacha yakunlashga va ilgari Birlashgan Arab Amirliklari hamda Gibraltarni ro‘yxatdan chiqarish uchun parlament qo‘llovini qayta tiklashga va’da bergan edi. «Politico» tanishgan loyihaviy hujjatda Rossiyaga oid qaror YIning rasmiy xavfli davlatlar ro‘yxatiga qo‘shimcha sifatida kiritilishi ko‘rsatilgan.
Komissiya ichki hujjatlarida Rossiya bilan ma’lumot almashinuvi deyarli yo‘qligi baholashni qiyinlashtirayotgani ta’kidlangan. Rossiyaga nisbatan sanksiyalar allaqachon Yevroittifoq moliyaviy xizmatlariga kirishni jiddiy cheklagan, ammo qora ro‘yxatga kiritish banklar uchun yangi majburiyatlarni ham yuklaydi.
2024 yildan boshlab Yevroittifoq FATF qarorlarini to‘liq avtomatik tarzda takrorlamaydi — chunki Ittifoq o‘zining yangi Pul yuvishga qarshi organi (AMLA)ni tuzmoqda. 2027 yildan boshlab AMLA qora ro‘yxatni tayyorlashda asosiy ishtirokchiga aylanadi. Bundan tashqari, moliyaviy josuslik tuzilmalari o‘rtasidagi hamkorlikni rivojlantirishda muhim rol o‘ynagan hollandiyalik mutaxassis Henni Verbek-Kusters AMLA ijroiya kengashiga qo‘shilish arafasida.
