Европада газ нархи 90 фоизга қимматлашди

Яқин Шарқдаги геосиёсий кескинлик фондида Европа Иттифоқида табиий газ нархи қарийб 90 фоизга ошди. Бу ҳақда Брюсселда ўтган матбуот анжуманида Европа комиссиясининг қонунчиликни амалга ошириш ва соддалаштириш масалалари бўйича комиссари Пер Граменя маълум қилди.

Унинг айтишича, ҳарбий ҳаракатлар бошланганидан буён нефт нархи ҳам сезиларли даражада қимматлашиб, тахминан 40 фоизга ошган. Комиссар таъкидлашича, нефть нархининг бундай тез суръатда ўсиши ҳатто Украинадаги уруш бошланган даврдаги динамикадан ҳам юқори бўлган.

Бозорда ноаниқлик кучайди

Энергия нархларининг ошиши Европа молия бозорларига ҳам таъсир кўрсатди. Граменя маълумотларига кўра, можаро бошланганидан бери Европа компаниялари акциялари ўртача 9 фоизга арзонлашган.

Бу ҳолат инвесторлар кайфиятига ҳам салбий таъсир қилган. Чунки геосиёсий хавфлар кучайганида инвесторлар одатда хавфли активлардан четга чиқиб, хавфсизроқ активларга ўтишга ҳаракат қилади.

Инвесторлар кайфияти ўзгарди

Европа комиссияси вакили таъкидлашича, геосиёсий беқарорлик бошланишидан олдин инвесторлар Европа иқтисодиёти истиқболига нисбатан ижобий фикрда эди. Шу сабабли Европа акциялари ва облигацияларига талаб юқори бўлган.

Бироқ Яқин Шарқдаги можаро бу ижобий тенденцияни вақтинча секинлаштирган. Граменянинг фикрича, вазият барқарорлашса, бозордаги кайфият ҳам яна тикланиши мумкин.

Газ ва нефт нархи рекорд даражага чиқди

Биржа маълумотларига кўра, Европа газ бозорида нархлар савдо бошида кескин кўтарилиб, минг куб метр газ учун 800 долларгача етган. Бу эса 2023 йил январидан бери кузатилмаган энг юқори кўрсаткич ҳисобланади.

Шу билан бирга, жаҳон бозорида Brent маркали нефт нархи бир муддат баррел учун 119 доллардан ҳам ошиб кетди. Кейинчалик нархлар бироз пасайиб, май ойи фьючерслари тахминан 104 доллар атрофида савдо қилинди.

Эслатиб ўтамиз, аввалроқ Европа ерости газ омборларидаги захиралар кескин камайиб, 2026 йил март ойи бошига келиб тарихий минимумга яқинлашгани ҳақида хабар берган эдик.