Зеленский Путинга яна учрашув таклиф қилди
Путин Украина президентининг аввалги таклифини рад этиб, бундай учрашувдан ҳеч қандай маъно йўқлигини айтган эди.
Украина президенти Володимир Зеленский Россия билан урушни тўхтатиш бўйича музокаралар ўтказиш мақсадида Владимир Путинга G7 саммити доирасида учрашув таклиф қилинганини маълум қилди.
Бу ҳақда «Reuters» агентлиги хабар берди.
Зеленскийнинг таъкидлашича, учрашув Франциянинг Эвиан шаҳрида бўлиб ўтаётган G7 саммити доирасида ташкил этилиши мумкин эди.
«Биз Путин билан G7 саммити вақтида учрашишга тайёр эканимизни билдирдик. У ерда Трамп ва Макрон иштирок этади, яъни Европа ва АҚШ вакиллари ҳам бўлади. Бу барча учун яхши имконият деб ҳисоблаймиз», — деди Зеленский.
Москва жавоб бермаган
Украина президентининг сўзларига кўра, Европа давлатлари ва АҚШ мазкур ташаббусни қўллаб-қувватлаган. Бироқ Россия томонидан расмий жавоб келмаган.
«Европа ва Қўшма Штатлар ўзаро келишувга эришди, Россия эса мулоқотга тайёр эмаслигини яна бир бор кўрсатди», — деди Украина раҳбари.
Киевдаги манбанинг «Reuters» агентлигига билдиришича, таклиф тўғридан-тўғри Россия вакилларига етказилган, аммо аниқ жавоб олинмаган.
Учрашув ғояси аввал ҳам илгари сурилган
Зеленский 4 июн куни ҳам Путинга очиқ мактуб йўллаб, урушни тугатиш масаласини муҳокама қилиш учун шахсий учрашув ўтказишни таклиф қилган эди.
Шунингдек, у музокараларга Европа давлатлари ва АҚШни жалб қилиш зарурлигини таъкидлаган.
АҚШ президенти Доналд Трамп ҳам Украина ва Россия етакчилари ўртасида тўғридан-тўғри мулоқот ўтказилишини қўллаб-қувватлаган.
Бироқ Россия президенти Владимир Путин мазкур очиқ мактуб билан танишганини айтган ҳолда, ҳозирги шароитда бундай учрашув ўтказишдан маъно кўрмаётганини билдирган.
