2030-йилда икки марта Рамазон ойи бошланади

2030-йил давомида Рамазон ойи икки марта бошланади. Биринчи Рамазон 2030-йил 5 январда бошланиб, шу йилнинг ўзида тугайди. Иккинчиси эса 2030-йил 26-декабрда бошланиб, 2031-йилда якунланади.

Шу тариқа бир йил ичида биринчи Рамазонда 30 кун, иккинчисида эса 6 кун рўза тутилади. Натижада жами 36 кун рўза тутишга тўғри келади.

«Бу цикл 32–33 йилда бир марта такрорланади»

Туркия Дин ишлари олий кенгаши астрономи Ҳумейра Нур Ишлекнинг «Анадолу»га маълум қилишича, ҳижрий тақвимга кўра Рамазон ойи тахминан 32–33 йилда бир марта бир йил ичида икки марта бошланади.

Унинг таъкидлашича, бу ҳолат ҳижрий тақвим ҳар йили милодий тақвимдан тахминан 10–11 кун олдин келиши билан боғлиқ.

«Шу тарзда барча ойлар милодий тақвим бўйлаб айланиб чиқади. 2030-йилда Рамазон ойи 5-январда бошланади ва 30 кун рўза тутилади. Йил охирига яқин, 26-декабрда яна Рамазон бошланади ва 6 кун рўза тутилади. Демак, йил бошида 30 кун, йил охирида 6 кун – жами бир йилда 36 кун Рамазон рўзаси тутилади», – деди у.

Ишлекнинг айтишича, Рамазон ойининг бир йилда икки марта бошланиши фақат 2030-йилга хос ҳолат эмас. Илгари ҳам 1900, 1932, 1964 ва 1997-йилларда январ ва декабр ойларида Рамазон бошланган ва шу йилларда икки марта Рамазон бошланиши кузатилган.

Ҳисоб-китобларга кўра, тахминан 2062–2063-йилларда ҳам бу цикл яна такрорланиши мумкин. Умуман олганда, бу ҳолат ҳар 32–33 йилда бир марта содир бўлади.

Маълумот учун, 2026-йилда Ўзбекистонда Рамазон ойининг бошланиши 19-феврал кунига тўғри келди. Бугун, 9-март Рамазоннинг 19-куни.