8 килога яқин олтинни автомобил эҳтиёт қисмлари ичига яшириб чегарадан ўтказмоқчи бўлганлар ушланди

Олтин қуймаларнинг мамлакатимиздан ноқонуний олиб чиқилишига чек қўйилди, деб хабар бермоқда ДХХ ахборот хизмати.

Маълумотларга кўра, Андижон вилоятининг Хўжаобод туманида ўтказилган тезкор тадбирда, «Дўстлик» чегара божхона пости яқинида Фарғона вилоятида яшовчи, 1994 йилда туғилган Т.Т. тўхтатилиб, унга тегишли хўжалик қопи холислар иштирокида кўздан кечирилган.

Натижада, қоп ичидаги 3 дона темир қопламали автомобиль эҳтиёт қисмлари махсус воситалар ёрдамида бўлакларга ажратилганда, уларнинг ичига жами 7 кг 784 г олтин бўлаклари яширилганлиги маълум бўлган.

Баҳолаш хулосасига кўра, ушбу олтин қуймаларнинг умумий қиймати 12 млрд 465 млн 795 минг сўмни ташкил этади.

Аниқланишича, мазкур фуқаро Тошкент шаҳридан юборилган олтинларни Қирғиз Республикасида қабул қилиб оладиган шахсга юк автотранспорт воситалари ҳайдовчилари орқали божхона назоратидан яширган ҳолда етказиши керак бўлган.

Ҳозирда унга нисбатан Жиноят Кодексининг 25,182-моддаси 2-қисми «а» банди билан жиноят иши қўзғатилиб, «қамоқ» эҳтиёт чораси қўлланилган.

Тергов ҳаракатлари доирасида ушбу қимматбаҳо металлни ҳақиқий эгаларининг шахсини аниқлаш бўйича чоралар кўрилмоқда.

Эслатиб ўтамиз, аввалроқ Самарқандда ноқонуний олтин сотганлар фош этилган эди. Айбланувчилар қонунга хилоф равишда жами оғирлиги 475 грамни ташкил қилган 2 бўлак олтин қуймаларни харидорга 737 млн сўмга сотишга келишиб, олдиндан 500 млн сўм олган вақтда ашёвий далиллар билан қўлга олинган.