АҚШ Мадурони террорист деб эълон қилди, унинг боши учун мукофот тайинланди
Вашингтон Венесуэла раҳбарини террорчиликда айблаб, унинг боши учун 50 млн доллар мукофот эълон қилди. Бу қарор можарони янада кескинлаштириши мумкин.
АҚШ ҳукумати Венесуэла президенти Николас Мадурони террорчилик ташкилоти етакчиси деб эълон қилди. Расмий Вашингтон Мадурони қўлга киритиш учун унинг бошига 50 миллион долларлик мукофот тайинлади. Бу ҳақда Оқ уйда ўтказилган брифингда маълум қилинди.
Оқ уй матбуот котиби баёнотида «Мадуро режимини нолегитим деб биламиз ва ноқонуний куч сифатида кўрамиз», дейилган. Бу қарор АҚШ ва Венесуэла ўртасидаги мураккаб муносабатларни янада таранглаштириши мумкин.
Маълумотларга кўра, президент Доналд Трамп аввалроқ Лотин Америкасидаги гиёҳвандликка қарши кураш доирасида ҳарбий кучлардан фойдаланиш ҳақида фармон чиқарган эди. Шундан сўнг АҚШ Венесуэла қирғоқларига денгиз кучларини — сувости кемалари ва USS Gerald R. Ford авиаташувчи ҳарбий кемасини йўллаган.
Пентагон раҳбари Пит Ҳэгсетт АҚШ ҳарбийлари Венесуэлада режимни ўзгартиришга қаратилган операцияларга тайёр эканини айтган. Бунга жавобан Мадуро мамлакатда 4,5 миллионлик халқ милициясини сафарбар этганини ва ҳар қандай ҳужумни қайтара олишини маълум қилган.
Шунингдек, Венесуэла ҳукумати АҚШнинг денгиздаги ҳаракатларини танқид қилган. Уларни халқаро ҳуқуққа зид деб баҳолаб, АҚШ томонидан «гиёҳванд моддаларга қарши кураш» ниқоби остида амалга оширилаётган ҳаракатларни агрессия сифатида баҳолаган.
