Байтқўрғон – Паркент электрлаштирилган темир йўли қуриб битказилди

Байтқўрғон-Паркент электрлаштирилган темир йўли тармоғининг қурилиш ишлари якунланди. Бу ҳақда Транспорт вазирлиги матбуот хизмати хабар берди.

Тошкент вилоятининг Паркент туманида узунлиги 23,8 км бўлган мазкур бир излик темир йўл линиясининг қурилиши 2025-йил бошида бошланган эди.

Лойиҳа доирасида кўприклар, туннел ва инфратузилма объектлари барпо этилди. Темир йўлда кунига 275 минг нафаргача йўловчи ташиш мумкин.

Туташув нуқтаси

Байтқўрғон бекати Қибрай туманида жойлашган бўлиб, у Тошкент–Хожикент темир йўл тармоғининг муҳим бўғини ҳисобланади. Янги йўл айнан шу нуқтадан Паркент томонга қараб йўналиш олган.

Релеф мураккаблиги

Паркент тумани денгиз сатҳидан баландда, тоғ олди ҳудудларида жойлашган. Шу сабабли 23,8 км масофада туннеллар ва кўприклар қурилиши муҳандислик нуқтаи назаридан мураккаб лойиҳа ҳисобланади. Паркентда дунёда иккитагина бўлган (бири Францияда) Катта Қуёш печи ва Материалшунослик институти жойлашган. Темир йўлнинг ишга тушиши ушбу ноёб объектга сайёҳлар ва олимларнинг келишини кескин осонлаштиради.

Паркент узумчиликка ихтисослашган. Сўқоқ ва Кумушкон каби дам олиш масканларига борувчи сайёҳлар оқими ёз мавсумида автомобил йўлларида тирбандлик ҳосил қилар эди. Темир йўл бу муаммони ечишга қаратилган.

Шу вақтгача Тошкентдан Паркентга фақат «Қўйлиқ» ёки «Роҳат» айланма йўллари орқали, асосан такси ёки автобусларда бориш мумкин эди.