Чиқиндидан қарзи бор 152 минг абонентнинг электр тўловига чеклов қўйилди
Маиший чиқинди хизматларидан қарздор минглаб истеъмолчиларга нисбатан электр энергияси тўловларига вақтинчалик чекловлар жорий этилди.
Ўзбекистонда маиший чиқинди хизматларидан қарздори мавжуд 152 мингга яқин абонентнинг электр энергияси учун тўловига вақтинчалик чеклов ўрнатилди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги маълум қилди.
Огоҳлантириш ва тўловлар
16 январ ҳолатига кўра, 87,5 млрд сўм дебитор қарздорликка эга 873 990 та абонентга SMS орқали огоҳлантириш юборилган. Шундан сўнг, қарзни бартараф этиш учун истеъмолчиларга беш кунлик муддат берилди. Ушбу давр мобайнида 7,4 млрд сўм миқдорида тўлов амалга оширилди.
Чеклов қўлланган абонентлар
Белгиланган муддатда қарзини тўламаган истеъмолчиларга нисбатан электр энергияси тўловларига чеклов жорий этилди. Мамлакат кесимида 151 202 та абонентнинг 14,8 млрд сўмлик маиший чиқинди хизматлари бўйича қарзи мавжудлиги аниқланди ва айнан шу тоифадаги истеъмолчиларга чеклов қўлланилди.
Мазкур тизимнинг жорий этилиши
Маълумот учун, 1 ноябрдан бошлаб Тошкент шаҳрида чиқинди ташиш бўйича қарздорлик мавжуд бўлганда электр энергияси тўловларига чекловлар кучга кирган. Биринчи ҳафтада 25,1 минг нафар абонент 2,24 млрд сўмлик қарз ҳақида огоҳлантирилган бўлса, уларнинг 6 минг нафари муддат тугагач чекловларга дуч келган.
Янги тизим декабр ойидан бутун республика бўйлаб жорий этилди. Ўшанда 231 минг абонент 20,1 млрд сўмлик қарздорлик бўйича огоҳлантириш олган, дастлабки беш кунда эса 9,4 млрд сўм тўланган. Чекловлар фақат 2025 йил 1 июлдан кейин тўпланган чиқинди қарзларига тааллуқли. Қарздорлар ҳақидаги маълумотлар ҳар ойнинг 3 санасига қадар «Toza Makon» тизимидан «HET Billing»га узатилади.
