Чусовитина Жаҳон кубоги финалига чиқди
50 ёшли ўзбекистонлик гимнастика афсонаси Боку шаҳрида ўтаётган Жаҳон кубогининг дастлабки саралаш баҳсларида финал йўлланмасини қўлга киритди.
Озарбойжоннинг Боку шаҳрида ўтаётган спорт гимнастикаси бўйича Жаҳон кубогида Ўзбекистон терма жамоаси аъзоси Оксана Чусовитина таяниб сакраш дастурида финал йўлланмасини қўлга киритди.
Саралаш баҳсларида Чусовитина 13.049 балл жамғариб, умумий ҳисобда учинчи ўринни эгаллади ва у мусобақанинг ҳал қилувчи босқичида иштирок этиш ҳуқуқини қўлга киритди.
Мазкур йўналишдаги финал 7 март куни бўлиб ўтади.
Оксана Чусовитина саккиз карра Олимпиада иштирокчиси саналади. У 1992 йил Барселона Олимпиадасида Бирлашган жамоа таркибида жамоавий баҳсларда олтин медалга сазовор бўлган.
Шунингдек, 2008 йил Пекин Олимпиадасида Германия терма жамоаси сафида иштирок этиб, таяниб сакраш дастурида кумуш медални қўлга киритган.
У ўтган йили ҳам Озарбойжонда ўтган спорт гимнастикаси бўйича Жаҳон кубогида иштирок этиб, таяниб сакраш дастурида олтин медални қўлга киритган эди.
