Дам олиш кунлари Ўзбекистоннинг кўплаб ҳудудларида ёғингарчилик кузатилади

Дам олиш кунлари давомида Ўзбекистон ҳудудларининг катта қисмида об-ҳаво ўзгарувчан бўлиши кутилмоқда. Бу ҳақда Ўзгидромет хабар берди.

Жума куннинг биринчи ярмида Ўзбекистон ҳудудининг катта қисмида ёғингарчилик (ёмғир, қор) бўлади, фақат шимолий ҳудудларда ёғингарчилик кутилмайди. Ҳаво ҳарорати кундузи +1...+6 даража илиқ, шимолда -2...-7 даража совуқ бўлади.

Шанба куни республика ҳудуди бўйича ёғингарчилик кутилмайди, фақат Фарғона водийси ҳудудларида ёғингарчилик (ёмғир, қор) бўлиши мумкин. Ҳаво ҳарорати кечаси -2 даража совуқ, +3 даража илиқни ташкил этади, кундузи +7...+12 илиққача кўтарилади.

Якшанба куни асосан ёғингарчиликсиз об-ҳаво бўлиши кутилмоқда. Ҳаво ҳарорати кечаси 0...+5 даража илиқни, кундузи +10...+15 даража илиқни ташкил этади.

Баъзи жойларга туман тушиши мумкин. Шамол секундига 7-12 метр тезликда эсади, 6 ва 8 февраль кунлари айрим жойларда 13-18 метргача кучайиши мумкин.

Тоғли ҳудудларда вақти-вақти билан ёғингарчилик (ёмғир, қор) бўлади. Қор кўчиши хавфи бор.

Тошкентда жума куннинг биринчи ярмида ёғингарчилик кузатилади, туман тушиши мумкин. Шамол ғарбдан секундига 5-10 метр тезликда эсади. Ҳарорат +3...+5 даража илиқ бўлади.

Дам олиш кунларида ёғингарчилик кутилмайди, эртага кечаси ва эрталаб туман тушиши мумкин. Шамол шарқдан секундига 3-8 метр тезликда эсади.

Ҳарорат эртага кечаси -1 даража совуқ, +1 даража илиқ, кундузи +9...+11 даража илиқ, якшанба куни кечаси +1...+3 даража илиқ, кундузи +13...+15 даража илиқ бўлади.