Давактив «Paynet» сотилишига оид битим тафсилотларини маълум қилди
Тўлов тизимининг 100 фоиз улуши қонунчиликда белгиланган имтиёзли сотиб олиш ҳуқуқи асосида реализация қилинган.
Давлат активларини бошқариш агентлиги жамоатчиликка олдиндан эълон қилинмасдан амалга оширилган «Paynet» тўлов ташкилотининг хусусийлаштириш юзасидан илк бор муносабат билдирди. Бу ҳақда 8-октябр куни бўлиб ўтган матбуот анжуманида агентлик директори Соҳибжон Муродов маълум қилди, деб хабар бермоқда Vaqt.uz мухбири.
«Paynet» тўлов тизими 2024-йилда корхонанинг 100 фоиз улуши «New Industrial Technologies» компаниясига ўтган ва кенг жамоатчилик бу ҳақда Статистика агентлигининг корхона ва ташкилотлар тўғрисидаги маълумотлари орқали хабар топганди.
Агентлик директори «Paynet» улушини реализация қилишда қонунчиликда белгиланган механизмлардан фойдаланилганини таъкидлади.
Унинг тушунтиришича, «Масъулияти чекланган жамиятлар тўғрисида»ги қонунга мувофиқ, компания иштирокчиларидан бири ўз улушини сотмоқчи бўлса, қонунчиликка мувофиқ, бошқа иштирокчилар ёки жамиятнинг ўзи ушбу улушни имтиёзли сотиб олиш ҳуқуқига эга бўлиши мумкин. «Paynet»даги улушни реализация қилишда ҳам шу тартиб қўлланган.
«У қонун билан белгиланган устуворлик ҳуқуқи бўлган. Шу ҳуқуқдан фойдаланган ҳолда реализация қилинган», — деди Муродов.
Унинг қайд этишича, шунга ўхшаш тартиб бошқа масъулияти чекланган жамиятларнинг улушларини реализация қилишда ҳам қўлланиши мумкин. Бундай ҳолатларда улушни сотиб олиш бўйича имтиёзли ҳуқуқ қонунчиликда белгиланган тартибда амалга оширилади.
Муродов бундан буён хусусийлаштиришнинг ушбу усулларидан фойдаланилганда ҳам кенг жамоатчиликка ахборот бериб борилишини қўшимча қилди.
«Paynet» улуши 2024-йилда қандай сотилганди?
«Paynet» хизмати 2005-йилда Ботир Орифжонов томонидан яратилган. Кейинчалик тадбиркор компанияни Халқ банки кўринишида давлатга (60 минг долларга, гарчи активи 10 миллион долларга баҳоланган бўлса-да) сотган.
2024-йил апрел ойида «Paynet» тўлов хизматини бошқарувчи «Uzpaynet» компаниясининг таъсисчиси ўзгарган. Реестр маълумотларига кўра, корхонанинг 100 фоиз улуши «New Industrial Technologies» компаниясига ўтган.
Давлат «Paynet»ни бундан олдин ҳам хусусийлаштириши ҳақида эълон берганди. 2022-йилнинг августида Давлат активларини бошқариш агентлиги компаниянинг давлатга тегишли 100 фоиз улушини сотувга чиқарган. Бир ой ичида потенциал харидорлардан еттита ариза келиб тушган.
Давактив агентлиги изоҳ берган масалалар
• «UzAuto Motors»ни сотиб олишга қизиқаётган уч давлат номи очиқланди. «UzAuto Motors» ва «UzAuto Motors Powertrain» компанияларини хусусийлаштириш жараёнига АҚШ, Жанубий Корея ҳамда Хитой компаниялари қизиқиш билдирмоқда.
• «Ўзбекистон почтаси» АЖ атрофида «Wildberries» билан боғлиқ янги бошқарув модели ва 100 млрд сўмлик кредит масаласи муҳокамаларга сабаб бўлди. Давлат активларини бошқариш агентлиги (Давактив) эса компания хусусийлаштирилмагани ва мазкур қарз олинмаганини маълум қилди.
• «Uzbekistan GTL» заводини хусусийлаштириш жараёни ва акцияларини бириламчи оммавий жойлаштириш (IPO) бўйича дастлабки босқичлар бошланди. Агентлик раҳбарининг сўзларига кўра, айрим йирик халқаро молиявий ташкилотлар GTL заводининг IPOсида иштирок этиш бўйича агентликка расман мурожаат билан чиққан.
• Давлат активларини бошқариш агентлиги Низомий номидаги Ўзбекистон миллий педагогика университети ётоқхонасининг сотилишига изоҳ берди. Янги ётоқхона қурилиб, талабалар у ерга кўчирилмагунча, мавжуд бинода уларнинг яшаши давом этади.
