Экспансия давом этмоқда: европаликларнинг ярмидан кўпи Хитой автомобилларига харидор бўлмоқчи

Европа автомобил бозорида истеъмолчилар кайфиятида катта ўзгариш юз бермоқда. «Bernstein» таҳлилчилари ўрганган «Horváth & Partner» тадқиқоти маълумотларига кўра, Европа ҳайдовчиларининг 55 фоиздан ортиғи Хитой брендидаги автомобил сотиб олиш имкониятини кўриб чиқмоқда. Таққослаш учун, 2023-йил охирида бу кўрсаткич атиги 43 фоиз эди. Бу ҳақда «Investing.com» хабар берди.

«Сифат тўсиғи» енгиб ўтилди

Аввал Хитой автомобилларига нисбатан мавжуд бўлган шубҳа тез суръатларда йўқолмоқда. Ҳозирда европаликларнинг фақат 21 фоизи бундай автомобилларни мутлақо рад этади, ҳолбуки икки йил олдин бу кўрсаткич қарийб 46 фоизни ташкил этган.

Мамлакатлар кесимида

Испания ва Венгрия – энг юқори очиқлик: истеъмолчиларнинг 75 фоизи Хитой автомобилларини сотиб олишга тайёр

Италияда 64 фоиз ҳайдовчи Хитой брендларига қизиқиш билдирмоқда

«Volkswagen» ва «BMW» ватани ҳисобланган Германияда ҳам қизиқиш 46 фоизгача ошган

Бу тенденция Европа бозорида рақобат кескин кучаяётганини ва Хитой автомобил ишлаб чиқарувчилари таъсири ортиб бораётганини кўрсатади.

Нега европаликлар устуворликларни ўзгартирмоқда?

Таҳлилчиларга кўра, бу ўзгаришнинг икки асосий сабаби бор. Хитой ишлаб чиқарувчилари аккумулятор технологиялари ва дастурий таъминотдаги устунлигидан фойдаланиб, нисбатан арзон нархда премиум функцияларни таклиф қилмоқда.

Хавфсизлик ва ишончлилик ҳали ҳам муҳим бўлиб қолса-да, истеъмолчилар тобора «технологик» омилларга кўпроқ аҳамият бермоқда:

тез қувватланиш

аккумулятор захираси (пробег)

замонавий мултимедиа тизимлари

Европа гигантлари учун чақириқ

«BYD», «MG» ва «NIO» каби брендлар энди «экзотика» сифатида қабул қилинмаяпти. «Албатта сотиб оламан» деганлар сони икки йил ичида икки бараварга ошиб, 13 фоизга етган.

Бу Европа автоконцернлари учун жиддий сигнал ҳисобланади – бозор улушини ҳимоя қилиш имконияти тобора қисқармоқда. Рақобат энди фақат нарх атрофида эмас, балки технологик устунлик учун курашга айланмоқда.