Эпштейн файллари: 3 млн ҳужжат орасида Ўзбекистон ва Қозоғистон билан боғлиқ ёзишмалар ҳам бор

АҚШ Адлия вазирлиги томонидан 30 январ куни вояга етмаганларни жинсий эксплуатация қилишда айбланган молиячи Жеффри Эпштейн ишига доир 3 миллиондан ортиқ ҳужжатни очиқлади. Ушбу улкан тўпламда сиёсатчилар, бизнесменлар, Ҳолливуд юлдузлари ва оддий фуқароларнинг исмлари тилга олинади. Ҳужжатларда Марказий Осиё, хусусан Ўзбекистон билан боғлиқ бир қатор ёзишмалар ҳам мавжуд.

Бу материаллар Эпштейннинг одам савдоси ва жинсий эксплуатация тармоғининг марказида турганини тасдиқлаши мумкин.

Самарқандлик қиз ва хорижга чиқиш орзуси

Архивдаги 2012 йил 8 март санаси билан муҳрланган мактуб алоҳида эътиборни тортади. Унда самарқандлик қиз Эпштейнга ўқиш, виза ва тирикчилик харажатларини қоплаш учун ёрдам сўраб мурожаат қилган.

Ёзишмаларга кўра, қиз аввал Малайзияда ўқишга кирган, кейин эса Париждаги Ню Йорк Филм академияси кампусида қисқа муддатли курсларда қатнашишга ҳаракат қилган. Бу сафарлар учун маблағлар Эпштейнга алоқадор шахслар орқали юборилган. Айрим пул ўтказмалари унинг адвокати Даррен Индике номидан амалга оширилган.

Қиз ўз мактубида Ўзбекистонда виза олишдаги қийинчиликлар, иқтисодий босимлар ва «янги ҳаёт бошлаш» истаги ҳақида очиқ ёзган. У моделлик орқали АҚШ визаси олиш умидини ҳам билдирган. Аммо ёзишмаларда Эпштейн бу ёрдам эвазига нима талаб қилгани очиқ айтилмайди.

Қозоғистон: Карим Масимов ва «Давлат хавфсизлиги генерали»

Янги файлларда «Қозоғистон», «Остона» ва «Олмаота» сўзлари 400 мартадан кўпроқ учрайди. Ҳужжатларда келишича, Эпштейннинг шахсий самолёти Москва, Рига ва Вилнюс орқали Олмаота ва Остонага қатнаган. У ерда «нуфузли шахслар» билан учрашувлар олдиндан режалаштирилган.

Архивда Қозоғистон Миллий хавфсизлик қўмитасининг собиқ раҳбари Карим Масимовнинг исми бир неча бор тилга олинади. Эпштейннинг одамлари Масимовга «салом етказишгани» ва Ню Йоркдаги учрашувларни эслашгани ҳақида ёзишган. 2019 йилги ҳужжатларда Эпштейннинг вакили Қозоғистондан қайтгач, «давлат хавфсизлиги учун масъул генерал» билан кўп вақт ўтказгани ва ўзаро ишончли алоқа ўрнатилгани ҳақида хабар берган.

Қурбонлар ва «учинчи шахслар» масаласи

Архивнинг бошқа қисмлари Эпштейннинг дунёнинг энг бой одамлари билан алоқаларини фош қилишда давом этмоқда. Айрим қурбонлар кўрсатмаларида Гислен Максвелл воситачилик қилгани айтилган.

Айблов меморандумларида машҳур кинопродюсер Ҳарви Вайнштейннинг исми ҳам тилга олинади. Қурбонлардан бири уни массаж пайтида жинсий алоқага мажбурлаганини айтган. Вайнштейн бу даъволарни рад этади.

Шунингдек, молиячи Леон Блэк, француз модел агенти Жан-Люк Брюнел ва бошқа шахслар ҳақида ҳам оғир айбловлар келтирилган. Брюнел бир неча йил аввал қамоқда ўз жонига қасд қилган.

Ҳужжатлар Эпштейннинг Билл Гейтс ва Илон Маск билан ёзишмалари ва улар учун ташкил қилинган махфий учрашувлар ҳақидаги маълумотларни ҳам ўз ичига олади. Қурбонларнинг кўрсатмаларига кўра, Эпштейн қизларни ушбу шахсларга «массаж» ва жинсий хизматлар учун топширган. Бу орқали у элита вакилларини жиноятга шерик қилиб, улар устидан назорат ўрнатган.

Виржиния Жуффре ва шаҳзода Эндрю

Эпштейн ишининг энг машҳур қурбонларидан бири — Виржиния Жуффре — Эпштейн ва Максвелл уни Британия шаҳзодаси Эндрю билан жинсий алоқа қилишга мажбурлаганини даъво қилган эди. Бу иш халқаро миқёсда катта шов-шувга сабаб бўлган, аммо шаҳзода айбловларни рад этган.

Трамп

Очиқланган ҳужжатларда АҚШ президенти Доналд Трампнинг исмлари ҳам учрайди. Ҳужжатларга кўра, номаълум шахснинг дугонаси тахминан 35 йил аввал содир бўлган воқеа ҳақида айтиб берган. Жабрланувчи ўша пайтда 13–14 ёшда бўлган ва Доналд Трамп уни мажбуран жинсий ҳаракатларга ундаган.

Қаршилик кўрсатган қиз Трампни тишлаган, шундан сўнг юзига зарба олган. Шу қиз Жеффри Эпштейн томонидан ҳам зўравонликка учрагани айтилади.
Иш бўйича фигурантларнинг исмлари расмий равишда махфийлаштирилган. Доналд Трамп буни ёлғон деб атади. Яна бир ҳужжатда Эпштейн 14 ёшли қизни Трампга тегишли Мар-а-Лаго қароргоҳига олиб келгани ҳақида маълумот бор.

Нима учун бу ҳужжатлар муҳим?

Адлия вазирлиги 6 миллион саҳифалик архивдан фақат ярмини эълон қилган. Қолган қисми қурбонларнинг шахсий маълумотлари ва болаларга нисбатан зўравонлик акс этган материаллар сабаб махфий сақланган.

Шу билан бирга, ҳужжатлар расмийларнинг «учинчи шахслар иштирок этгани бўйича далил йўқ» деган позициясини шубҳа остига қўяди. Қурбонлар адвокатларига кўра, Эпштейн бой ва қудратли одамлар учун ёш қизларни етказиб берган тармоқни бошқарган.

Жеффри Эпштейн ким?

Молиячи Жеффри Эпштейн ўнлаб вояга етмаган қизларни жинсий эксплутация қилишда айбланган. Тергов маълумотларига кўра, уларнинг энг кичиги 14 ёшда бўлган. Шунингдек, у кенг қамровли фоҳишабозлик тармоғини ташкил этишда гумон қилинган. Эпштейннинг 2019 йил 10 августда Ню Йоркдаги камерада жасади топилган.

Эпштейн иши бўйича аввалроқ эълон қилинган суд ҳужжатларида бир қатор таниқли сиёсатчилар, жамоат арбоблари ва шоу-бизнес вакилларининг исмлари қайд этилган эди.

Улар орасида — шаҳзода Эндрю, Доналд Трамп, Билл Клинтон, Исроилнинг собиқ бош вазири Эҳуд Барак, АҚШнинг собиқ вице-президенти Алберт Гор, актёр Кевин Спейси, хонанда Майкл Жексон, иллюзионист Дэвид Копперфилд, адвокат Алан Дершовиц ва Ню Мексико штатининг собиқ губернатори Билл Ричардсон бор.

АҚШ Федерал суриштирув бюроси (FBI) Адлия вазирлиги билан биргаликда олиб борилган тергов якунларига кўра, таниқли шахслардан иборат «мижозлар рўйхати» мавжудлиги ҳақида далиллар топилмаганини маълум қилди.

Маҳкама Эпштейн камерада ўз жонига қасд қилган деган хулосага келди ва сиёсатчилар, машҳурлар ҳамда тадбиркорларнинг алоқадорлигини яшириш мақсадида у ўлдирилган деган версияни рад этди.

Америкалик журналист Такер Карлсон аввалроқ Эпштейн «Исроил учун ишлаганини» ва бу гўёки Вашингтонда ҳамма биладиган факт эканини таъкидлаган эди, гарчи расман бундай баёнотлар тасдиқланмаган бўлса-да.

«The Wall Street Journal» нашрининг хабар беришича, Эпштейннинг дўсти Гислен Максвелл гўёки унинг танишларидан Эпштейннинг 50 ёшлик юбилейига табрикнома ёзишни илтимос қилган. Нашр маълумотларига кўра, бундай мактуб муаллифларидан бири Доналд Трамп бўлган.