ФИФА раҳбари ЖЧ чипталари нега қиммат эканини тушунтирди

ФИФА президенти Жанни Инфантино Шимолий Америкада бўлиб ўтадиган жорий йилги Жаҳон чемпионати чипталарининг юқори нархларини ҳимоя қилиб чиқди. Унинг таъкидлашича, бутун дунё эътиборини ўзига тортадиган ушбу мусобақа ташкилотнинг ҳар тўрт йилда бир келадиган асосий ва ягона даромад манбаи ҳисобланади.

17 апрел куни Ню-Йоркда бўлиб ўтган «Semafor» жаҳон иқтисодиёти саммитида сўзга чиққан Инфантино ФИФА 211 та давлатни ўзида бирлаштирган нотижорат ташкилот эканини яна бир бор эслатиб ўтди.

«Жаҳон чемпионатидан миллиардлаб даромад кўришимиз ҳеч кимга сир эмас, аммо кўпчилик ФИФАнинг нотижорат ташкилот эканини билмайди. Бу эса топган барча фойдамизни бутун дунё бўйлаб 211 та давлатда футболни ташкил этиш ва ривожлантиришга сарфлашимизни англатади. Агар биз ажратадиган грантлар бўлмаганда, ушбу мамлакатларнинг тўртдан уч қисми футбол мусобақаларини ўтказа олмаган бўларди. Шу боис, биз доим энг мақбул мувозанатни топишга интиламиз», — деди Инфантино.

Чипта нархлари

17 апрел куни «StubHub» иккиламчи чипталар сайтида ўтказилган ўрганишлар шуни кўрсатдики, АҚШнинг 12 июн куни Парагвайга қарши ўтказадиган дастлабки ўйини учун энг арзон чипта 1359 доллар этиб белгиланган. Лос-Анжелесдаги ўйингоҳнинг қуйи қаторларидаги жойлар нархи эса ҳатто 14 минг долларгача етади.

19 июл куни Ню-Йорк ҳудудида бўлиб ўтадиган Жаҳон чемпионати финали учун юқори қаторлардаги чипта нархи 8860 долларни ташкил қилса, қуйи қисмдаги чипталар 25 минг долларгача баҳоланмоқда.

Чипталар нархи ва уларнинг тақчиллиги билан боғлиқ дастлабки эътирозлардан сўнг, ФИФА ҳар бир стадионнинг кичик бир қисми учун 60 долларлик арзонлаштирилган вариантни жорий қилди.

«Шимолий Америка ўзига хос бозор»

«ФИФА учун асосий ва ҳозирча ягона даромад келтирадиган тадбир бу — Жаҳон чемпионатидир. Жаҳон чемпионати ҳар тўрт йилда бир ойгина давом этади, демак, биз фақат шу бир ой ичида маблағ ишлаб топамиз. Кейинги мусобақагача бўлган 47 ой давомида эса ўша маблағни сарфлаймиз», — деди Инфантино.

Инфантино Шимолий Американи «жуда ўзига хос бозор» деб атади ва бу бозорни яхшироқ «англаш» мақсадида сўнгги икки-уч йил давомида АҚШда яшаб келаётганини таъкидлади.

Янги формат

Бу йилги Жаҳон чемпионатида рекорд миқдорда — 48 та терма жамоа иштирок этмоқда. Жамоалар ҳар бирида 4 тадан иштирокчи бўлган 12 та гуруҳга бўлинган. Ўйинларга АҚШ, Канада ва Мексика мезбонлик қилади. Мусобақа давомида жами 104 та учрашув ўтказилиши кўзда тутилган бўлиб, бу ҳам турнир тарихидаги янги рекорд ҳисобланади.