Фото ва видео орқали қайд этиладиган ҳуқуқбузарликлар рўйхати тасдиқланди
Махсус автоматлаштирилган фото ва видео қайд этиш техника воситалари (радарлар) орқали қайд этиладиган маъмурий ҳуқуқбузарликларнинг қатъий рўйхати белгиланди.
2026 йил 4 февралда қабул қилинган ЎРҚ–1116-сонли қонун билан Маъмурий жавобгарлик тўғрисидаги кодексга қўшимча ва ўзгартиришлар киритилди.
Қонунчиликка киритилган ўзгартиришларга мувофиқ, махсус автоматлаштирилган фото ва видео қайд этиш техника воситалари орқали қайд этиладиган маъмурий ҳуқуқбузарликларнинг қатъий рўйхати белгиланди.
Жумладан:
— хавфсизлик камаридан фойдаланиш қоидаларига риоя этмаслик;
— транспортни бошқариш вақтида телефондан фойдаланиш;
— белгиланган ҳаракат тезлигини соатига 20 кмдан кўп бўлмаган катталикда ошириб юбориш;
— тўхташ ёки тўхтаб туриш қоидаларини бузиши ва бошқалар.
Жазо қўллаш муддатлари
Қонунчиликда ушбу ҳуқуқбузарликлар учун маъмурий жазо қўллаш муддатлари ҳам аниқ белгилаб қўйилди. Агар йўл қоидаси бузилгани фото ёки видео қайд этиш воситалари орқали аниқланган бўлса, маъмурий жазо ҳуқуқбузарлик содир этилган кундан эътиборан бир ойдан кечиктирмай қўлланилиши шарт.
Маъмурий жавобгарликка тортиш тўғрисидаги қарор устидан шикоят қилинган ҳолларда эса жазо қўллаш муддати кенгайтирилади. Бундай вазиятда маъмурий жазо ҳуқуқбузарлик содир этилган кундан эътиборан бир йилдан кечиктирмай қўлланилиши мумкин.
Эслатиб ўтамиз, аввалроқ айнан шу қонун билан йўл ҳаракати билан боғлиқ айрим ҳуқуқбузарликлар учун маъмурий огоҳлантириш қўлланилиши ҳақида хабар берган эдик. Маъмурий огоҳлантириш — ҳуқуқбузарлик содир этган шахсни қонунга хилоф хатти-ҳаракатларни такрорламаслик тўғрисида расмий равишда огоҳлантириш ва унга танбеҳ беришдан иборат.
