Франция ва АҚШда НАТОдан чиқиш масаласи кўтарилмоқда
Парижда АҚШ сиёсатига норозилик ортидан Франциянинг НАТОдан чиқиши ҳақида резолюция таклиф этилди.
Франция парламентида мамлакатнинг НАТОдан чиқишига доир резолюция лойиҳаси тақдим этилди. Ташаббус муаллифи — Миллий ассамблея вице-президенти, «La France Insoumise» («Енгилмас Франция») партияси депутати Клеманс Гетте. Унинг таъкидлашича, АҚШ олиб бораётган ташқи сиёсат Франция ва бутун Европа Иттифоқининг стратегик манфаатларига зид келмоқда.
Гетте «Berliner Zeitung» нашрига берган изоҳида Вашингтонни «очиқ империячилик сиёсати»да айблади. Унга кўра, АҚШ Европа Иттифоқини вассал ҳолатига тушириб қўйган ва бу Франциянинг алянс доирасида қолишини маъносиз қилиб қўяди. Депутат АҚШнинг суверен давлатларга нисбатан таҳдидлари, санкцион босими ҳамда НАТО аъзоларидан Америка ҳарбий-саноат мажмуаси манфаатлари йўлида харажатларни ошириш талабларини асосий далил сифатида келтирди.
Резолюция муаллифи фикрича, НАТОдан чиқиш Францияга ҳарбий ва дипломатик мустақилликни қайта тиклаш имконини беради. У бундай қарор мамлакатни халқаро майдонда яккалаб қўймаслигини, аксинча, кўп томонлама форматлар орқали таъсирини кучайтиришини таъкидлади. Гетте Франция ташқи сиёсатида экология, қуролсизланиш ва жамоат манфаатларини ҳимоя қилиш устувор йўналишга айланиши кераклигини билдирди.
Ушбу мавзу фонида НАТОнинг ўзида ҳам ноаниқлик кучаймоқда. Алянснинг собиқ бош котиби Йенс Столтенберг «Der Spigel» нашрига берган интервюсида АҚШнинг келажакда НАТОдан чиқиш эҳтимолини инкор этмади. У 2025 йил декабрда АҚШ Конгрессига НАТОдан чиқиш бўйича қонун лойиҳаси киритилганини эслатиб, «ҳеч нарса абадий эмас», деган фикрни билдирди.
Столтенберг ўз хотираларида 2018 йилда Доналд Трамп ёпиқ учрашувда АҚШнинг НАТОдан чиқиши билан таҳдид қилганини ҳам қайд этган.
