Ғазо бўйича Тинчлик кенгашига қайси давлатлар таклиф қилинди? (Рўйхат)
Аввалроқ Трамп Тинчлик кенгашига Ўзбекистонни ҳам таклиф қилганди. Маълумотларга кўра, мазкур кенгашга 50 та давлат таклиф этилган.
© Фото: bloomberg.com «Bloomberg» нашри Доналд Трамп ташаббуси билан Ғазо бўйича Тинчлик кенгашига аъзоликка таклиф этилган давлатлар рўйхатини эълон қилди. Нашр манбаларга таяниб тузган рўйхатда жами 49 та давлат номи, шунингдек, Европа комиссияси кўрсатилган. Ушбу мамлакатлар орасида Ўзбекистон ҳам бор.
Кенгаш раҳбари
«Bloomberg»нинг ёзишича, Трамп Фаластин эксклавида барқарор тинчликни таъминлаш ва ҳудудни қайта тиклашга қаратилган 20 банддан иборат режани илгари сурмоқда. Ушбу режани амалга ошириш учун янги халқаро тузилма — Тинчлик кенгаши ташкил этилиши режалаштирилган бўлиб, унга АҚШ президентининг ўзи раислик қилади.
Кенгаш низоми
«Bloomberg»нинг қайд этишича, айрим давлатлар кенгашнинг иш шартларини қайта кўриб чиқишни таклиф қилганига қарамай, Трамп 22 январ куни Давосда ўтадиган форум доирасида Тинчлик кенгаши низомини имзолашни режалаштирмоқда.
Тинчлик кенгашига доимий аъзо бўлиш учун давлатлардан 1 миллиард доллар миқдорида бадал тўлаш талаб этилади. Трамп танқидчилари ушбу тузилмани Бирлашган Миллатлар Ташкилотига муқобил институт сифатида баҳоламоқда.
Рўйхат
Нашр рўйхатни манбалар маълумоти ҳамда ижтимоий тармоқларда тарқалган расмий ва норасмий хабарлар асосида шакллантирган. Шу сабабли «Bloomberg» ҳали барча давлатлар таклифни олганини ёки унга муносабат билдирганини тасдиқламаганини, рўйхат эса якуний эмаслигини таъкидламоқда.
Маълумот учун, юқоридаги рўйхатда кенгашга таклиф этилган давлатлар санаб ўтилган, уларнинг орасида таклифни рад этганлари ҳам бор. Жумладан, Франция АҚШ президенти Доналд Трамп Ғазо бўйича Тинчлик кенгашига аъзо бўлишни рад этган. Бунга нисбатан Трамп агар Париж кенгашга қўшилмаса, француз вино ва шампанларига 200 фоизлик бож жорий этишини маълум қилганди.
«Reuters»га кўра, Хитой ҳам Трампнинг Тинчлик кенгашига қўшилиш таклифини олганини тасдиқлаган. Бироқ Пекин ҳозирча ушбу таклифни қабул қилиш ёки рад этиш борасида аниқ қарорга келганини очиқламаган. Бу ҳолат Хитой ва Вашингтон ўртасида яқинда эришилган савдо соҳасидаги нозик келишувлар фонида кузатилмоқда.
Аввалроқ Шавкат Мирзиёев Ўзбекистон Тинчлик кенгашида таъсисчи давлат сифатида иштирок этиш таклифини қабул қилгани ҳақида хабар бергандик.
