Трамп Макрондан аччиқланди ва 200 фоизлик бож билан таҳдид қилди
Эммануэл Макрондан «Тинчлик Кенгаши»га қўшилиш таклифига рад жавобини олган Трамп француз вино ва шампанларига 200 фоизлик бож қўйиш билан таҳдид қилди.
АҚШ президенти Доналд Трамп Ғазо бўйича Тичлик кенгаши аъзолигини рад этган Франция президенти Эммануэл Макронга нисбатан кескин баёнот бериб, агар Париж кенгашга қўшилмаса, француз вино ва шампанларига 200 фоизлик бож жорий этишини маълум қилди.
Бу баёнот Оқ уйда журналистлар билан мулоқот чоғида янграгани ҳақида ёзмоқда «Bloomberg».
«Ҳеч ким уни (кенгашда бўлишини) хоҳламайди, чунки у жуда тез орада ўз лавозимини тарк этади. Мен унинг виноларига 200 фоизлик бож жорий қиламан ва у барибир бизга қўшилади», — деди Трамп журналистларга.
Трампнинг сўзларига кўра, Макрон унинг ташаббусини қабул қилмаслиги ҳақида хабарлар тарқалганидан сўнг у шундай қарорга келган. АҚШ президенти француз раҳбарини яқин орада лавозимини тарк этиши билан боғлаб, унинг халқаро сиёсатдаги таъсири пасайганини таъкидлади ва савдо воситалари орқали босим ўтказиш мумкинлигини очиқ билдирди.
Маълумот учун: Эммануэл Макроннинг президентлик муддати келгуси йил якунига етади. У навбатдаги сайловларда қатнашмаслигини маълум қилган.
Франциянинг эътирози
Франция ҳукумати Трамп таклиф қилаётган «Тинчлик кенгаши» фақат Ғазо масаласи билан чекланмасдан, БМТнинг институционал тамойилларига зид бўлиши мумкинлигидан хавотирда.
Макронга яқин манбаларга кўра, Париж учун БМТ доирасидаги халқаро ҳуқуқий механизмлар музокарасиз қадрият ҳисобланади.
Кенгашнинг бошқа танқидчилари ҳам Трампнинг бу қадамини БМТга муқобил ёки рақиб тузилма яратишга уриниш сифатида баҳоламоқда. Улар бундай ташаббус глобал бошқарув тизимида янги зиддиятлар келтириб чиқариши мумкинлигини таъкидламоқда.
Трампнинг «Тинчлик кенгаши»
Маълумотларга қараганда, Трамп маъмурияти «Тинчлик кенгаши»да доимий ўрин олишни истаган давлатлардан камида 1 миллиард доллар молиявий ҳисса қўшишни талаб қилмоқда.
Трамп Россия президенти Владимир Путин ҳам кенгашга таклиф этилганини тасдиқлади. Путиннинг матбуот котиби Дмитрий Песков ҳам таклиф ўйлаб кўрилаёганини маълум қилган.
Трампга кўра, бир қатор давлатлар, жумладан, Аргентина ва Канада етакчилари ҳам мазкур ташаббусга жалб этилган. Шунингдек, Трамп Шавкат Мирзиёевга ҳам Тинчлик кенгашига аъзо бўлиш учун таклиф юборган. Мирзиёев Ўзбекистон Тинчлик кенгашига таъсисчи давлат сифатида қўшилишга тайёрлигини билдирган.
