Ҳиндистон нефт компаниялари Россия нефтидан воз кеча бошлади

Ҳиндистоннинг энг йирик нефт қайта ишловчи компаниялари — давлатга қарашли «Indian Oil», «Bharat Petroleum» ҳамда хусусий «Reliance Industries» март ва апрел ойларида етказиб бериш учун Россия нефтини харид қилиш бўйича янги таклифларни қабул қилишни тўхтатди. Бу ҳақда тармоқдаги манбаларга таяниб «Reuters» хабар бермоқда.

Манбаларга кўра, компаниялар ушбу қарорга АҚШ ва Ҳиндистон ўртасидаги савдо келишувига кўмаклашиш мақсадида келган. Шу билан бирга, март ойига мўлжалланган айрим етказиб беришлар аввалроқ шартномалаштирилган ва бекор қилинмаган.

«Reuters» суҳбатдошларининг таъкидлашича, бошқа кўплаб нефтни қайта ишловчилар ҳам Россия нефтини харид қилишни тўхтатган. Уларнинг фикрича, бундай етказиб беришлар фақат ҳукумат тавсияси билан қайта тикланиши мумкин.

Ҳукумат сигнали

Нашр манбаларининг маълум қилишича, Россия нефтини харид қилиш учун махсус рухсат олиши мумкин бўлган ягона компания — Европа Иттифоқи санкцияларига тушган «Nayara Energy» ҳисобланади. Ушбу компанияда «Роснефт» улушга эга. Бироқ «Nayara Energy»нинг қуввати кунига 400 минг баррел нефтни қайта ишлаши мумкин заводи апрел ойида режали техник хизмат сабаб бир ойга тўхтатилади.

7 февралдан АҚШ президенти Доналд Трамп Ҳиндистон товарларига жорий этилган 25 фоизлик божларни бекор қилди. Унинг айтишича, Ню Деҳли Россиядан нефт импортини «тўлиқ ёки билвосита» тўхтатиш мажбуриятини олган. Ҳиндистон расмийлари бу ҳақда очиқ баёнот бермаган.

Шу билан бирга, Трамп агар Россия нефти етказиб бериш қайта тикланса, божлар яна жорий этилиши мумкинлигини огоҳлантирган.

Бозор қайта тақсимланмоқда

АҚШ ва Ҳиндистон ўртасида имзоланган рамкавий савдо келишувига кўра, Ню Деҳли келгуси беш йил ичида АҚШдан 500 млрд долларлик энергетика маҳсулотлари, самолётлар, технологиялар ва хомашё сотиб олади.

2022 йилда Украинадаги уруш бошланганидан сўнг Ҳиндистон Россия нефтининг энг йирик харидорига айланган эди. 2025 йил ўрталарига келиб етказиб бериш ҳажми кунига 2 млн баррелга етган, кейин эса АҚШ ва Евроиттифоқ босими остида пасайиш бошланган.

«Reuters» маълумотларига кўра, 2026 йил баҳорида Ҳиндистон Россия нефти импортни 500–600 минг баррелгача қисқартиришни режалаштирмоқда. Бу орқада мамлакат Яқин Шарқ, Африка ва Жанубий Америкадан нефт харидини оширмоқда.