ИЛМА «Global Insurance Group» лицензиясини бекор қилди
«Global Insurance Group» суғурта компаниясининг лицензияси ИЛМА қарори билан 9-майдан бекор қилинди. Компания аввал тузилган шартномалар бўйича мажбуриятларни тўлиқ бажариши шартлигини белдиланди.
Истиқболли лойиҳалар миллий агентлиги «Global Insurance Group» суғурта компаниясининг лицензиясини бекор қилди. Регулятор қарори 9-майдан кучга кирган бўлиб, компания аввал тузилган шартномалар бўйича мажбуриятларни бажаришда давом этади.
Агентлик матбуот хизмати маълумотига кўра, «Global Insurance Group»ка 2022-йил февраль ойида берилган суғурта фаолияти лицензияси расман бекор қилинди. Компаниянинг амалдаги суғурта ва қайта суғурта шартномалари бўйича жавобгарлиги сақланиб қолади.
Бундан ташқари, ИЛМА 6-май куни «Leo Finance Sug‘urta Broker» лицензиясини бекор қилиш ҳақида ҳам қарор қабул қилди. Мазкур қарор 10-майдан кучга кирган.
«Global Insurance Group» билан боғлиқ муаммолар илк бор 2025-йил октябр ойида юзага чиққанди. Ўшанда агентлик молиявий кўрсаткичларни текшириш жараёнида қонунбузарликлар аниқланганини билдириб, компания лицензиясини 10 кунга тўхтатган эди.
Шу билан бирга, регулятор компанияни 35 миллион сўм жаримага тортган ва мижозларга камчиликлар тўлиқ бартараф этилмагунча ушбу суғурталовчи орқали полис расмийлаштирмасликни тавсия қилган.
Кейинчалик ИЛМА яна бир нечта суғурта компанияларига нисбатан молиявий санксиялар қўллади. Жумладан, «Alskom» 50 миллион сўм, «Инсон» 40 миллион сўм, «Semurg Insurance» эса 31,5 миллион сўм миқдорида жаримага тортилди.
2025-йил 8-ноябрдан бошлаб «Global Insurance Group» лицензиясининг амал қилиши олти ой муддатга тўхтатилганди. Агентлик бу қарор компаниянинг ихтиёрий аризаси асосида қабул қилинганини таъкидлаган.
