Инфантино Трамп маъмуриятидан ёрдам сўрамоқда — NYT

ФИФА президенти Жанни Инфантино ўз лавозимини сақлаб қолиш мақсадида АҚШ президенти Доналд Трамп маъмуриятидан ёрдам олишга ҳаракат қилмоқда.

«New York Post» нашри манбаларига таяниб хабар беришича, 3 август куни у АҚШ давлат котиби Марко Рубио билан учрашув ўтказиши кутилмоқда.

Нашр суҳбатдошларидан бирига кўра, расман учрашувда футболнинг АҚШнинг «юмшоқ кучи» сифатидаги ўрни муҳокама қилиниши режалаштирилган. Бироқ манба бу мулоқотнинг асосий мақсади Инфантинони эҳтимолий истеъфодан ҳимоя қилиш эканини таъкидлаган.

«У давлат котиби билан боғланиб, футбол Америка юмшоқ кучининг бир қисми бўлиши мумкинлиги ҳақида гаплашмоқчи бўлган. Аммо барчамиз биламизки, гап ишдан бўшатилишдан ҳимояланиш ҳақида кетмоқда», — деган манба.

Инқирозга сабаб бўлган 4,2 миллиард долларлик лойиҳа

Газета маълумотларига кўра, юзага келган инқирозли вазиятда ФИФА раҳбари Доналд Трамп билан бир неча бор телефон орқали боғланишга уринган. Нашрнинг эслатишича, Инфантино жаҳон чемпионати ҳуқуқларининг бир қисмини хусусий инвесторларга сотишни таклиф қилганидан сўнг кескин танқидларга учраган ва кейинчалик бу ғоядан воз кечишга мажбур бўлган эди.

Дастлабки режага мувофиқ, ФИФАнинг асосий эркаклар ва аёллар ўртасидаги мусобақаларини назорат қилувчи янги компания тузилиши кўзда тутилган эди.

Инфантинонинг фикрича, «FIFA Forward Enterprise» лойиҳасининг ташкил этилиши ФИФАга аъзо ассоциацияларнинг даромадларини ошириб, жаҳон миқёсида футбол ривожига улкан ҳисса қўшган бўларди.

Халқаро футбол федерациясининг ҳисоб-китобларига кўра, мазкур схема 4,2 миллиард доллар миқдорида сармоя жалб қилиши мумкин эди.

Жамоатчилик эътирози ва истеъфо

Бироқ ушбу ташаббус футбол мутасаддилари, миллий федерациялар ва бошқа ташкилотлар томонидан кескин қораланди.

Таниқли спорт журналисти Ромен Молинанинг хабар беришича, Инфантино ташкилот ичида ўзига нисбатан ишончни йўқотгани сабабли тез орада истеъфога чиқиши кутилмоқда.