Жапаров кетадими ёки қолади? Суд баҳсли масалага якуний нуқта қўйди

Қирғизистон Конституциявий суди 2021 йил январида 2010 йилги Конституцияга асосан президент этиб сайланган Садир Жапаров олти йиллик ваколат муддатини тўлиқ ўташи ҳақида қарор чиқарди.

Нима учун янги беш йиллик муддат Жапаровга тааллуқли эмас?

Суд шарҳига кўра, 2021 йилда қабул қилинган янги таҳрирдаги Конституцияда назарда тутилган беш йиллик муддат амалдаги президент мандатига татбиқ этилмайди. Чунки Жапаровнинг ваколати аввалги — 2010 йилги Асосий қонун доирасида бошланган.

Қарорда таъкидланишича, 2021 йилги Конституцияда белгиланган «икки муддатдан кўп эмас» деган чеклов амалдаги олти йиллик муддатни бекор қилмайди ёки қисқартирмайди. Ушбу муддат биринчи президентлик даври сифатида ҳисобланади.

Муддатидан олдин сайлов ўтказиш учун қонуний асослар

Қайд этилишича, муддатидан олдин сайловлар ўтказиш асослари 2021 йилги Конституциянинг 72-моддаси 1-қисмида аниқ белгиланган. Улар қаторига истеъфо, лавозимдан четлатиш, соғлиғи сабаб вазифани бажара олмаслик ёки вафот этиш киради. Муддатлар бўйича жамоатчилик муҳокамалари бундай асослар сирасига кирмайди.

Навбатдаги сайлов санаси

Қарор президентнинг Конституциявий судга мурожаати асосида қабул қилинган. 11 феврал куни Садир Жапаров президентлик сайловлари қачон ўтказилиши лозимлиги бўйича расмий тушунтириш сўраган эди.

Шу тариқа, навбатдаги президентлик сайлови 2027 йил 24 январда ўтказилиши лозимлиги билдирилган.