Jetstar Asia iyul oxirida yopiladi, yo‘lovchilar pullarini qaytarishini talab qilishmoqda

Kompaniya yuqori miqdordagi yetkazib beruvchi xarajatlari, aeroport to‘lovlari va mintaqaviy raqobatning kuchayishi tufayli moliyaviy qiyinchiliklarga duch keldi. 500 nafardan ortiq xodim ishdan bo‘shatilishi kutilmoqda. Jetstar Asianing yopilishi Avstraliyadagi Jetstar Airways yoki Yaponiyadagi Jetstar Japan faoliyatiga ta’sir qilmaydi. Bu haqda Qantas aviaguruhi — Jetstar Asianing hammuassisi — ma’lum qildi. Kelasi haftalarda parvozlar soni bosqichma-bosqich qisqartiriladi. 31 iyuldan keyingi parvozlar uchun chipta olgan yo‘lovchilar bilan alohida bog‘laniladi. Ayrim mijozlar Qantas guruhiga tegishli alternativ reyslarga o‘tkazilishi mumkin. Boshqa provayderlar orqali chipta olganlar esa tegishli manbalarga murojaat qilishi lozim. Jetstar Asia tomonidan Singapurdan Malayziya, Indoneziya va Filippinga amalga oshirilayotgan 16 ta reys bekor qilinadi. Yopilish orqali Qantas 500 mln avstraliya dollarini (qariyb 326 mln AQSH dollari) samolyot parkini yangilashga sarflashi rejalashtirilgan. Aviakompaniya 2004 yilda tashkil etilgan bo‘lib, 20 yil davomida faoliyat yuritdi. Joriy moliyaviy yilda 35 mln avstraliya dollari miqdorida zarar ko‘rilishi kutilmoqda. Kompaniyaning 51 foizi Singapurdagi Westbrook Investmentsga, qolgani esa Qantasga tegishli. Yopilish qarori mijozlar orasida afsus uyg‘otdi. Kompaniya esa barcha ishchi-xodimlar uchun kompensatsiya va yangi ish joyi topishda yordam berishini va’da qilmoqda.