Камбоджа ва Таиланд Трамп ҳузурида тинчлик келишувини имзолади
Куала-Лумпурда бўлиб ўтган ASEAN саммитида Камбоджа ва Таиланд чегара можаросини тугатиш бўйича декларация имзолади. Маросимда АҚШ президенти Доналд Трамп воситачи сифатида иштирок этди.
Камбоджа ва Таиланд чегара бўйлаб бир неча ойдан бери давом этиб келаётган можарони тугатиш бўйича расмий келишувга эришди. Тинчлик декларацияси Куала-Лумпурдаги ASEAN саммити доирасида имзоланди. АҚШ президенти Доналд Трамп жараёнда воситачи сифатида фаол иштирок қилди.
Келишувга кўра, томонлар барча ҳарбий ҳаракатларни тўхтатади ва яхши қўшничилик муносабатларини тиклайди. Таиланд 18 нафар камбоджалик ҳарбий асирни озод қилади, Камбоджа эса оғир артиллерияни чегарадан олиб чиқишни бошлайди. Оташкесимга риоя этилишини назорат қилиш вазифаси малайзиялик кузатувчилар зиммасига юкланди.
Маросимда сўзга чиққан Доналд Трамп ўзини «урушларни тўхтатишни яхши кўрадиган инсон» сифатида таърифлади.
«Бу ҳобби эмас, лекин мен бу ишда катта маҳоратга эгаман», — деди у журналистлар саволига жавобан. Президент ушбу келишувни ўзи «фахр билан воситачилик қилган буюк тинчлик битими», деб атади.
Музокаралар давомида АҚШ ҳам икки давлат билан муҳим иқтисодий келишувларга эришди. Камбоджа билан катта савдо битими имзоланган бўлса, Таиланд билан «стратегик аҳамиятга эга фойдали қазилмалар етказиб бериш бўйича келишув» тузилди. Шунингдек, Вашингтон Малайзия билан ҳам муҳим хомашё ва минерал маҳсулотлар бўйича шартнома имзолади. Энди ушбу уч давлат учун божхона тўловлари 49 фоиздан 19 фоизга туширилади.
Доналд Трамп Малайзияга олти кунлик Осиё турнеси доирасида етиб келган. Куала-Лумпур аэропортида уни миллий либосдаги раққосалар анъанавий рақс билан кутиб олди. Ташриф доирасида у Япония ва Жанубий Кореяга ҳам сафар қилади.
Таиланд ва Камбоджа ўртасидаги чегара можароси жорий йилнинг июл ойида бошланган эди — икки таиландлик аскар мина портлаши оқибатида ҳалок бўлганидан сўнг икки давлат чегарасида тўқнашувлар содир бўлган.
