Ким Ё Жон: «Сеулнинг алоқаларни тиклаш ҳақидаги хомхаёллари амалга ошмайди»

Шимолий Корея етакчисининг синглиси Ким Ё Жон Сеулнинг икки давлат ўртасидаги муносабатларни яхшилаш борасидаги интилишларини «хомхаёл» деб атаб, Пхенян мулоқот учун ҳеч қандай имконият қолдирмаганини айтди.

Шимолий Корея Меҳнат партиясининг юқори лавозимли вакили Ким Ё Жон Жанубий Корея ҳукуматининг икки мамлакат ўртасида алоқалар қайта тикланиши мумкинлиги ҳақидаги тахминларини қатъий инкор этди. Бу ҳақда «Al-Jazeera» ёзмоқда.

Ким Ё Жоннинг таъкидлашича, Сеул томонидан чегара орқали дронлар юборилиши Шимол суверенитетига нисбатан жиддий провокация ҳисобланади. Шу боис, Пхенян Жануб билан ҳар қандай шаклдаги дипломатик алоқаларни давом эттириш ниятида эмас ва Сеулнинг тинчлик ҳақидаги баёнотларини асоссиз деб ҳисоблайди.

«Сеулнинг «муносабатларни тиклаш» деб аталадиган турли хил умидларга тўла хомхаёлларига келсак, уларнинг ҳеч бири ҳеч қачон амалга ошмайди», - деган у.

Яқин кунларда содир бўлган дронлар билан боғлиқ ҳодиса икки Корея ўртасидаги кескинликни янада авж олдирди. Шимолий Корея давлат ОАВлари чегара яқинида уриб туширилган учувчисиз учиш аппаратлари қолдиқларини намойиш этиб, буни Жанубнинг навбатдаги тажовузи сифатида талқин қилди.

Ўз навбатида, Сеул расмийлари мазкур дронлар ҳарбийларга тегишли эмаслигини, улар тинч аҳоли ёки фаоллар томонидан учирилган бўлиши мумкинлигини билдирган бўлса-да, Пхенян бу важларни қабул қилмади.

Жанубий Кореянинг Бирлашиш вазирлиги Шимолнинг олдинги баёнотларида мулоқотга мойиллик аломатлари борлигини тахмин қилган эди. Бироқ Ким Ё Жон чоршанба куни эълон қилинган чиқишида Сеулнинг бундай ёндашувини «аянчли» деб атаб, муносабатларнинг ҳозирги ҳолати ҳеч қачон ўзгармаслигини таъкидлади. Унинг фикрича, Жанубий Корея раҳбариятининг хорижий давлатлар, хусусан, Япония билан ҳарбий ҳамкорликни кучайтираётгани минтақадаги тинчликка раҳна соладиган омилдир.

Шунингдек, Ким Ё Жон Жанубий Корея Президенти Ли Жэ Мён ва Япония Бош вазири Санаэ Такаичи ўртасидаги учрашувни кескин танқид остига олди. У Сеулнинг АҚШ ва Токио билан уч томонлама хавфсизлик алоқаларини мустаҳкамлашини Шимолий Кореяга қарши қаратилган «ялиниб-ёлвориш дипломатияси» деб баҳолади.

«Ижрочи раҳбар хорижда ўзининг ялиниб-ёлвориш дипломатияси билан жуда банд, расмийлар эса хомхаёлга берилиб, гўёки хайрихоҳлик кўрсатаётгандек кўринишга астойдил ҳаракат қилмоқдалар. Аммо муносабатларнинг ҳозирги ҳолати ҳеч қачон ўзгариши мумкин эмас», - деган Ким Ё Жон.