Колумбия ва АҚШ ўртасида дипломатик инқироз: Густаво Петро қурол кўтаришга тайёр

Колумбия президенти Густаво Петро АҚШ президенти Доналд Трамп томонидан айтилган айбловлар ва эҳтимолий таҳдидларга кескин жавоб қайтарди. Петронинг сўзларига кўра, у мамлакат мустақиллиги ва демократик институтларини ҳимоя қилиш учун зарур бўлса, қурол кўтаришга ҳам тайёр. Петро ўз баёнотини ижтимоий тармоқдаги саҳифасига жойлади.

Унда Петро Колумбияда кокаин ишлаб чиқариш билан боғлиқ айбловларни рад этиб, ўз ҳукуматининг гиёҳвандликка қарши курашдаги натижаларини эслатди. Унинг таъкидлашича, айнан унинг буйруғи билан дунёдаги энг йирик кокаин мусодараси амалга оширилган ва кока барглари етиштириш ҳажмининг ўсиши тўхтатилган.

Шунингдек, Колумбия раҳбари мамлакатдаги наркогуруҳларга қарши қатъий кураш олиб борганини қайд этди. У АҚШ раҳбарининг айбловларини асоссиз деб атаб, бундай баёнотлар икки давлат ўртасидаги муносабатларни кескинлаштиришини билдирди.

Петро Трампни шошма-шошар қарорлардан огоҳлантириб, агар Колумбия халқи ишонган ва ҳурмат қилган президентга нисбатан куч ишлатилса, бу жиддий оқибатларга олиб келишини айтди.

«Агар сиз халқ севган президентни ҳибсга олсангиз, халқ ягуарини занжирдан бўшатган бўласиз», — деб ёзди у.

Президент, шунингдек, ўтмишда қуролдан воз кечганини, аммо ватан тақдири хавф остида қолса, яна қурол олишга тайёр эканини билдирди.

«Мен аскар бўлмасам ҳам, уруш ва махфий операциялар ҳақида биламан. 1989-йилги тинчлик шартномасидан кейин мен бошқа ҳеч қачон қуролга тегмасликка қасам ичган эдим, аммо ватаним учун яна қурол оламан», - деди Колумбия президенти.

Бу баёнотлар Трампнинг Air Force One самолётида журналистлар билан суҳбати ортидан янгради. Ўша суҳбатда АҚШ президенти Колумбияга нисбатан Венесуэлада кузатилган сценарий такрорланиши мумкинлигини истисно этмаган эди.