Луврдаги талончиликдан сўнг Евгения тожи шикастланди
Лувр музейидаги йирик талончиликдан кейин Франция императори Наполеон III нинг рафиқаси Евгенияга тегишли тарихий тожнинг ҳолати маълум қилинди.
Парижда жойлашган Лувр музейида ўтган йил октябр ойида содир этилган талончиликдан кейин Франция императори Наполеон III нинг рафиқаси, императорица Евгенияга тегишли тарихий тож жиддий зарар кўргани маълум бўлди. Музей маъмуриятига кўра, артефакт деформацияга учраган бўлса-да, деярли бутун ҳолда сақланиб қолган ва уни тўлиқ реставрация қилиш имкони мавжуд.
Лувр раҳбарияти талончиликдан сўнг илк бор тожнинг ҳозирги ҳолатини акс эттирувчи фотосуратларни жамоатчиликка тақдим этди. Суратларда тож шаклининг бузилгани ва айрим элементларининг йўқолгани маълум қилинди.
Қайси безаклар йўқолган
Маълум қилинишича, жиноятчилар шиша витринадаги кичик очиқлик орқали тожни чиқаришга ҳаракат қилган. Натижада тожни безаб турган саккизта олтин бургутдан бири йўқолган. Шу билан бирга, қимматбаҳо безакларнинг асосий қисми сақланиб қолган: 56 та зумрад ва 1354 та олмосдан фақат ўнтаси йўқолган.
Лувр раҳбарияти XIX асрга оид ушбу нодир артефакт аслий кўринишига деярли сезилмас даражада қайтарилишини маълум қилди. Реставрация ишларини назорат қилиш учун музей президенти Лоранс де Карс раҳбарлигида махсус экспертлар қўмитаси тузилди.
Лувр музейидаги ўғирлик
Эслатиб ўтилади, талончилик 19 октябр куни содир бўлган. Жиноятчилар Сена дарёси томон қараган балкон орқали Апполон галереясига кириб, электр тизимини ўчирган ва қўриқчиларни бинодан чиқишга мажбур қилган. Улар император оиласига тегишли зеб-зийнат буюмлари сақланган икки витринани бузиб очган.
Прокуратура маълумотларига кўра, ҳужумчилар музей ичида тўрт дақиқадан кам вақт бўлган ва икки скутерда қочиб кетган. Умумий қиймати 88 миллион еврога баҳоланган зеб-зийнат буюмлари ўғирланган. Ҳозирга қадар тўрт нафар шахс қўлга олинган, бироқ асосий гумонланувчилар аниқланмаган. Императорица Евгенияга тегишли қолган етти нодир буюм ҳануз топилмаган.
