Мадуро Швейцарияга 127 тонна олтинни махфий чиқарган

Венесуэла ҳукумати ўн йил аввал давлат олтин захирасидан 127 тонна қимматбаҳо металлни махфий операция орқали Швейцарияга чиқарган. Бу ҳақда 7 январ куни «Euronews» эълон қилган тергов материалларида маълум қилинди. Операциянинг асосий мақсади — олтинни қайта эритиб, халқаро бозорларда сотиш ва валюта танқислигини юмшатиш бўлган.

Швейцария божхона маълумотларига кўра, Каракас олтинни беш йил давомида қисм-қисм қилиб Швейцарияга етказган. Чиқарилган металл қиймати тахминан 4,7 млрд швейцария франки, яъни 5,05 млрд евро атрофида баҳоланган. Швейцария жамоат телерадиоканали SRF бу ҳаракатларни Николас Мадуро ҳукумати томонидан амалга оширилган «умидсизлик акти» деб атаган.

Ўша даврда Венесуэла иқтисодиёти тез суръатларда таназзулга учраётган эди. Нефт экспортидан тушадиган даромад кескин камайган, ташқи қарзлар эса ошиб бораётганди. Ҳукумат олтинни тўғридан тўғри сотиш ёки уни гаров сифатида қўллаб, янги кредитлар жалб этишни режалаштирган.

Швейцариянинг танланиши тасодифий эмас. Мамлакат жаҳон олтин савдосининг марказларидан бири ҳисобланади ва энг йирик аффинаж заводлари айнан шу ерда жойлашган. Венесуэла олтини шу корхоналарда «Good Delivery» халқаро стандартига мос ҳолда қайта эритилган. Бу стандарт металл сифати ва сертификатларини кафолатлаб, уни сотишни анча осонлаштиради.

Шунга қарамай, режа ўзини оқламаган. 2017 йилга келиб Венесуэла ташқи қарзларини тўлай олмай қолди ва амалда дефолт ҳолатига тушди. Бугун мамлакат ташқи қарзи тахминан 170 млрд долларга тенг бўлиб, бу йиллик ЯИМдан икки баробар кўп. Мутахассислар Венесуэла иқтисодиётини деярли вайрон бўлган, деб баҳоламоқда.