Маск Эпштейн ҳақидаги ҳақиқат учун пул тўлашга тайёр
Илон Маскнинг исми ҳам Жеффри Эпштейн иши бўйича очиқланган материалларда учрайди. Хусусан, 2013 йилдаги мактублардан бирида у Эпштейн оролига бориш ҳақида сўрагани айтилган.
Америкалик тадбиркор Илон Маск молиячи Жеффри Эпштейннинг мижозлари рўйхати ҳақида гувоҳлик беришга рози бўлган шахсларга адвокатлик хизматлари учун ҳақ тўлашини эълон қилди. Бу ҳақда у ўзининг Х ижтимоий тармоғидаги саҳифасида ёзиб қолдирди.
«Мен бу борада ҳақиқатни сўзлаган ва шу сабабли жавобгарликка тортилган ҳар қандай шахснинг ҳуқуқий ҳимоясини молиялаштираман», — деб ёзди у фойдаланувчилардан бирининг хабарига жавобан.
Маскнинг исми ҳужжатларда тилга олиниши
Маскнинг ўзи ҳам Эпштейн иши бўйича материалларда тилга олинган. Хусусан, унинг исми молиячига йўлланган мактублардан бирида учрайди.
The Telegraph нашри келтирган, 2013 йил 31 январда исми ошкор этилмаган шахс томонидан Эпштейнга юборилган мактубда: «Илон Маск 2 январ куни сизнинг оролингизга келиш ҳақида сўраганини эслатиб ўтаман», — дейилади.
Миллиардер Эпштейн билан ҳар қандай алоқадорликни бир неча бор рад этган ва унинг оролига таклиф қилинганида доимо рад жавобини берганини таъкидлаган. Мактубда унинг исми тилга олинганига эса қисқача: «Бу ёлғон», — дея муносабат билдирди.
30 январ куни АҚШ Адлия вазирлиги ушбу иш бўйича яна 3 миллион саҳифалик ҳужжатлар, 2 мингдан ортиқ видео ва 180 мингта фотосуратни эълон қилди. Материалларнинг бир қисми таҳрир қилинган бўлиб, уларда жабрланувчиларнинг шахсий маълумотлари яширилган.
Эпштейн иши
2008 йилда у вояга етмаганларни фоҳишаликка жалб қилиш ва уларни зўрлаш бўйича айбланувчига айланган. Ўшанда молиячи ўз айбига иқрор бўлиб, тергов билан келишув имзолаган ва тахминан 13 ой қамоқ муддатини ўтаган.
2019 йилнинг июл ойида у болаларни жинсий эксплуатация қилиш мақсадида сотиш ва шундай жиноий фаолиятга жалб қилиш учун тил бириктириш айби билан такроран ҳибсга олинган. Тергов хулосаларига кўра, Эпштейн 2002 йилдан 2005 йилгача Ню Йорк ва Флоридадаги манзилларида ўнлаб вояга етмаган қизлар билан жинсий алоқада бўлган. Молиячи уларга юзлаб доллар нақд пул тўлаган, сўнгра айрим жабрланувчиларга янги қизларни жалб қилиш вазифасини топширган. Жабрланганларнинг ёши одатда 14 ёшга ҳам етмаган.
2019 йил август ойида Эпштейн қамоқхона камерасида ўз жонига қасд қилди. Унинг шериги Гислен Максвел эса жиноятларга кўмаклашгани учун 20 йиллик қамоқ жазосига ҳукм қилинган.
