Мессида рекордлар, Роналдуда антирекордлар: Суперюлдузлар жаҳон чемпионатини қандай бошлади?

Криштиану Роналду

Шимолий Америкада ўтаётган жаҳон чемпионати гуруҳ босқичининг дастлабки ўйинида Португалия терма жамоаси Конго ДР билан дуранг ўйнади (1:1). Криштиану Роналду эса ушбу баҳсда иккита антирекорд ўрнатди.

Португалиялик юлдуз йирик турнирлардаги голсиз сериясини кетма-кет 10 та ўйингача узайтирди. Роналду сўнгги бор бундай даражадаги мусобақаларда 2022 йилнинг 24 ноябрида, Қатардаги ЖЧ доирасида Ганага қарши кечган баҳсда (3:2) пеналтидан гол урган эди. Ўшандан бери ҳужумчи жаҳон ва Европа чемпионатларида жами 10 та учрашув ўтказиб, бирорта ҳам тўп кирита олмади.

Бундан ташқари, Роналду ўйин давомида тўпга бор-йўғи 25 марта тегиниш қилди. Бу ҳужумчи учун йирик халқаро турнирлардаги энг ёмон кўрсаткич бўлди (фақат тўлиқ ҳаракат қилган ўйинлари ҳисобга олинганда).

Ҳарри Кейн

Англия терма жамоаси жаҳон чемпионатидаги иштирокини ғалаба билан бошлади ва бунда жамоа сардори Ҳарри Кейннинг хизмати катта бўлди. Учрашув 4:2 ҳисобида якунланиб, рақиб дарвозасига киритилган голларнинг иккитасига айнан Кейн муаллифлик қилди.

Инглизлар сардори голлардан бирини 11 метрлик жарима нуқтасидан киритди. Бу унинг мундиаллар тарихида пеналтидан урган бешинчи голи бўлди. Шу тариқа, Кейн мазкур кўрсаткич бўйича мутлақ рекордчига айланди (ўйиндан кейинги пеналтилар серияси ҳисобга олинмаганда).

Бундан ташқари, ўйиннинг сўнгги сонияларида (90+5-дақиқада) Кейн тўпга танаси билан тўғаноқ бўлиб, жамоасини муқаррар голдан қутқариб қолди.

Лионел Месси

Лионел Месси жорий мундиални бирйўла бир нечта тарихий рекордларни янгилаш билан бошлади. Жазоир терма жамоасига қарши кечган ўйинда Аргентина сардори хет-трик қайд этиб, жамоасининг 3:0 ҳисобидаги йирик ғалабасини таъминлади.

Жазоирликлар дарвозасига йўлланган бу учта гол эвазига Месси жаҳон чемпионатларидаги умумий голлари сонини 16 тага етказиб олди. Натижада у шу пайтгача турнир тарихидаги энг яхши тўпурарлар рўйхатини якка ўзи бошқариб келаётган Мирослав Клозе билан тенглашди.

Шу билан бирга, Месси мундиаллар тарихида хет-трик қайд этган энг ёши катта футболчига айланди: ўйин куни у 38 ёшу 357 кунлик эди. Бу борадаги аввалги рекорд 2018 йилда 33 ёшу 130 кунлигида испанлар дарвозасига учта тўп киритган Криштиану Роналдуга тегишли эди. Шунингдек, аргентиналик афсона жарима майдончаси ташқарисидан гол уриш бўйича бразилиялик Ривелино билан тенглашиб олди (ҳар иккисида 5 тадан гол). Бундан ташқари, Месси тарихда олтита жаҳон чемпионатида майдонга тушган илк футболчи бўлди. Криштиану Роналду эса бу натижани 17 июн куни Конго ДРга қарши ўйинда такрорлади.

Яна бир аҳамиятли жиҳати шуки, аргентиналик ҳужумчи жаҳон чемпионатларидаги ўйинлар сони бўйича ҳам ўз рекордини янгилади — энди унинг ҳисобида 27 та учрашув бор. Фаолиятини давом эттираётган футболчилар орасида бу кўрсаткичга энг яқин турган ўйинчи — бу Роналду (22 та ўйин).

Ламин Ямал

Испания терма жамоаси ҳужумчиси Ламин Ямал жаҳон чемпионатларидаги дебютини ўтказди. У Кабо-Вердега қарши кечган учрашувнинг (0:0) 71-дақиқасида Гави ўрнига захирадан ўйинга қўшилди. Эътиборлиси, шифокорлар унинг сон мушакларидаги жароҳати қайталаниши хавфи юқори эканидан огоҳлантирганига қарамай, ёш иқтидор барибир майдонга тушди.

Ямал ўзига берилган 20 дақиқа давомида ўнг қанотда бир нечта ҳимоячини ортда қолдириб, юксак техникасини намойиш этди. Унинг жарима майдончаси ичига оширган хавфли узатмаси гол билан якунланмаган бўлса-да, 18 ёшли вингер ҳужумда доимий равишда кескинлик яратиб турди. Бироқ Испания барибир бу вазиятларни голга айлантира олмади.

Килиан Мбаппе

Килиан Мбаппе жорий йилда фаолиятидаги учинчи жаҳон чемпионатида иштирок этмоқда. Ҳужумчи Сенегалга қарши кечган дастлабки баҳсда дубл қайд этиб, Франция терма жамоасининг 3:1 ҳисобидаги ишончли ғалабасига улкан ҳисса қўшди.

Ушбу икки гол эвазига Мбаппе Франция миллий терма жамоаси тарихидаги энг яхши тўпурарлар рўйхатида биринчи ўринга кўтарилиб олди. Шунингдек, у мундиаллардаги умумий сермаҳсуллик рекордига ҳам яқинлашди ва амалдаги энг яхши кўрсаткичдан бор-йўғи иккита голга ортда қолмоқда.

Эрлинг Холанд

Норвегиялик тўпурар Эрлинг Холанд учун бу галги жаҳон чемпионати дебют мусобақага айланди. Норвегия турнирни Ироқ терма жамоаси устидан 4:1 ҳисобидаги ғалаба билан бошлади. Холанд 29 ва 43-дақиқаларда рақиб дарвозасини ишғол қилиб, дубл қайд этди ва айнан унинг киритган тўпи учрашув тақдирини ҳал қилувчи ғалаба голига айланди.

Холанд жаҳон чемпионатидаги дебют ўйинидаёқ иккита гол урган тарихдаги биринчи норвегиялик футболчига айланди. Мундиалдаги фаолиятнинг бундай ёрқин бошланиши саноқли ўйинчиларгагина насиб қилган.

Яна бир қизиқарли жиҳати шундаки, ушбу турнирда Холанд ўз футболкасига ота-онасининг қўшалоқ фамилияси — «Бреут-Холанд» ёзувини туширган ҳолда майдонда ҳаракат қилмоқда.