Meta ижтимоий тармоқларда пулли обуналарни синовдан ўтказади
Янги обуналар сунъий интеллект имкониятларини кенгайтириш ва фойдаланувчилар учун эксклюзив функциялар яратишга қаратилган.
Meta компанияси яқин ойлар ичида Instagram, Facebook ва WhatsApp платформаларида пулли обуналарни синов тариқасида жорий этишни режалаштирмоқда. Компания бу орқали фойдаланувчиларга қўшимча функционал имкониятлар, жумладан, самарадорлик ва ижодкорликни оширишга қаратилган хизматларни таклиф қилмоқчи.
Пулли обуна имконаятлари
Маълум қилинишича, янги обуналар доирасида сунъий интеллектга асосланган функциялар кенгайтирилади. Шу билан бирга, иловаларнинг асосий хизматлари бепул сақлаб қолинади. Пулли обуналар эса фойдаланувчиларга маълумот алмашиш, мuloқот ва контент устидан кенгроқ назорат қилиш имконини беради.
Компания ягона стандарт стратегияга қатъий амал қилмаслигини таъкидламоқда. Meta турли форматдаги обуна пакетларини синовдан ўтказиб, ҳар бир илова учун алоҳида эксклюзив функциялар мажмуасини шакллантиришни режалаштирган. Бу ёндашув фойдаланувчилар эҳтиёжини аниқроқ ўрганишга хизмат қилади.
Manus сунъий интеллект хизмати
Шунингдек, Meta яқинда тахминан 2 миллиард долларга сотиб олинган Manus сунъий интеллект агентини ҳам обуна дастурлари доирасида ривожлантирмоқчи. Компания Manus’ни ўз платформаларига интеграция қилиш билан бир қаторда, бизнес мижозлар учун алоҳида пулли обуналарни таклиф этишни ҳам давом эттиради.
Қайд этилишича, Instagram иловасига Manus сунъий интеллект хизмати учун махсус тезкор кириш тугмаси қўшиш устида ишлар олиб борилмоқда. Бу ҳақда ишлаб чиқиш босқичидаги, ҳали расман ишга туширилмаган функцияларни тез-тез фош қилиб турадиган мутахассис Alessandro Paluzzi эълон қилган скриншот орқали маълум бўлди.
Meta’нинг мазкур ташаббуси компаниянинг сунъий интеллект асосидаги сервислар ва пулли хизматлар ҳисобига даромад манбаларини кенгайтиришга қаратилган узоқ муддатли стратегиясининг бир қисми сифатида баҳоланмоқда.
