Наманганда «электр узилди» деган гап унутилди — вилоят ҳокими

Наманган вилояти ҳокими Шавкат Абдураззоқов Ўзбекистон мустақиллигининг 35 йиллиги муносабати билан янги объектларни ишга тушириш маросимида вилоятда электр таъминоти сезиларли яхшиланганини айтди.

«Битта нарсага амин бўлиб ҳамма қайтаряптики, Ўзбекистонда, Наманганда электр узилди деган гап одамларнинг эсидан чиқиб кетди», — деди ҳоким президент Шавкат Мирзиёев иштирокидаги тадбирда.

Унинг таъкидлашича, Наманганнинг ўзида иккита 500 мегаваттли қуёш электр станцияси, Учқўрғон, Норин, Учқўрғон туманларида 300 мегаваттга яқин ГЭСлар қурилиши, Поп туманида ҳам яна 200 мегаваттлик қурилиши айтилган гапларнинг исботи ҳисобланади.

Инвестициялар ўсмоқда

Абдураззоқовнинг айтишича, Наманган вилояти ўтган йили 4 миллиард доллар инвестиция жалб қилган. 2026 йилнинг дастлабки саккиз ойида эса бу кўрсаткич 3 миллиард 200 миллион долларга етган.

«Йил якуни билан сизга 5 миллиард доллар инвестиция киритишга ваъда берганмиз, бунинг устида ишлаяпмиз, аниқ лойиҳаларимиз бор», — деди вилоят раҳбари.

Унинг маълум қилишича, Озарбойжон билан ҳам ҳамкорлик доирасида қиймати 210 миллион долларлик учта инвестиция лойиҳасига старт берилган.

Йўллар ва янги вазифалар

Ҳоким вилоятда ички йўлларни таъмирлаш ишлари ҳам кенгайганини таъкидлади. Унинг сўзларига кўра, жорий йилнинг ўзида 1 минг 300 километр ички йўл таъмирланади.

Сўнгги йилларда эса Наманганда 6 минг 400 километр ички йўл асфальтланган. Абдураззоқов бундай ишлар илгари ҳеч бир соҳада бу даражада бўлмаганини айтди.

Ҳоким бу йил вилоятда барча манбалар ҳисобидан 12 трлн сўмлик инвестициялар ўзлаштирилаётганини айтиб, йил якунига қадар камбағалликни қисқартириш ва ишсизликни бартараф этиш бўйича белгиланган вазифалар бажарилишига ваъда берди.

«Биз сизга ваъда берамиз, йил якуни билан олдимизга қўйган камбағалликдан чиқариш, ишсизликни бартараф қилиш бўйича топшириқларни бажарамиз», деди Шавкат Абдураззоқов.