Нарх ошган: «Samsung» янги букланадиган смартфонларини тақдим этди

«Samsung Electronics» чоршанба куни Лондон шаҳрида паспорт ўлчамидаги янги букланадиган смартфонини намойиш қилди. Жанубий Корея компанияси хотира чиплари нархининг кўтарилиши ва букланадиган смартфонлар бозорида «Apple» томонидан кутилаётган рақобат фонида ўзининг иккита янгиланган модели нархини 100 долларга оширишга қарор қилди. Бу ҳақда «Reuters» нашри маълум қилди.

Лондонда бўлиб ўтган тадбирда «Alphabet» компаниясининг «Gemini» сунъий интеллекти асосида ишлайдиган учта янги «Galaxy Z» букланадиган модели намойиш этилди. Улар орасида видео контентларни кўп истеъмол қилувчиларга мўлжалланган, кенгроқ экранга эга ва паспорт ўлчамидаги «Galaxy Z Fold8» смартфонининг нархи 1899 доллар этиб белгиланди.

Компания ўзининг премиум тоифасидаги «Galaxy Z Fold8 Ultra» ва «чиғаноқ» шаклидаги «Flip8» моделлари нархини олдинги авлодларга нисбатан 100 долларга қимматлаштириб, мос равишда 2099 ва 1199 доллардан сотувга чиқарди.

Қувват борасида «Fold8» ва «Fold8 Ultra» моделлари «Qualcomm»нинг энг сўнгги процессори билан жиҳозланган. «Flip8» модели эса сотиладиган бозорга қараб «Qualcomm» ёки «Samsung»нинг ўзи ишлаб чиқарган «Exynos» чипида ишлайди.

Рақобат ва молиявий прогнозлар

Таҳлилчиларнинг фикрича, букланадиган смартфонлар бозорига асос солган «Samsung» учун бу йил ушбу тоифада рақобат кескинлашади. Чунки «Apple» компанияси жорий йилда «iPad mini» ўлчамидаги экранга эга ўзининг илк букланадиган смартфонини тақдим этиши тахмин қилинмоқда. «IDC» тадқиқот маркази вице-президенти Франциско Жеронимонинг таъкидлашича, бу тақдимот «Samsung» учун стратегик жиҳатдан энг муҳимларидан бири ҳисобланади ва компания ўзи яратган бозорни ҳимоя қилиш мақсадида таваккалга қўл уришга мажбур.

«IDC» прогнозларига кўра, хотира чиплари тақчиллиги сабабли 2026 йилда умумий смартфонлар бозори рекорд даражада – 14 фоизга қисқариши кутилмоқда. Шундай бўлса-да, «Samsung» ўзининг глобал смартфон бозоридаги улушини ошириши ва букланадиган қурилмалар етказиб бериш ҳажми 20 фоизга ўсиши тахмин қилинмоқда.

Шу билан бирга, баъзи экспертлар хотира чиплари нархининг кескин кўтарилиши фойда маржасини сиқиб қўяётгани сабабли, «Samsung»нинг мобил бўлинмаси апрель-июнь ойларида ўз тарихидаги илк чораклик зарарни қайд этиши мумкинлигини билдирмоқда. Гарчи бу вазият компаниянинг яримўтказгичлар бизнесига рекорд даражада фойда келтираётган бўлса-да, смартфон ишлаб чиқариш харажатларига сезиларли таъсир ўтказган. «Omdia» маълумотларига кўра, хотира ва сақлаш қурилмалари бюджет смартфонларининг умумий таннархида 60 фоиздан, премиум моделларда эса 30 фоиздан кўпроқ улушни эгаллайди.

«Omdia» катта таҳлилчиси Шенг Вин Чоунинг сўзларига кўра, 1500 доллардан қимматроқ қурилмаларда хотира чиплари таннархнинг кичикроқ қисмини ташкил қилгани учун премиум тоифада нарх ошишини ютиб юбориш имконияти кўпроқ, бироқ фақатгина катта экран билан қиммат нархни оқлаш борган сари қийинлашмоқда.