Нодир металлар пойгаси: АҚШ Қозоғистонни Хитойга муқобил деб эълон қилди
Вашингтоннинг Қозоғистондаги элчиси минтақадаги улкан захиралардан ҳайратда эканини билдирди.
Америка Қўшма Штатлари нодир металлар етказиб бериш масаласида Қозоғистонни Хитойга муносиб муқобил деб ҳисобламоқда. Бу ҳақда АҚШнинг Қозоғистондаги элчиси Жули Стаффт маълум қилди.
Қозоғистон — нодир металларнинг «яширин хазинаси»
«Сиз энг оддий саволни бердингиз ва унга жавобим қисқа: ҳа. Қозоғистонни Хитой назоратидаги нодир минераллар ўрнини боса оладиган муқобил манба сифатида кўряпмизми? Албатта. Қозоғистон ҳақидаги илк маълумотларни ўрганаётганимда, мени ушбу мамлакатнинг қазилма бойликларга қанчалик бой экани ҳайратда қолдирди. Гап шунчаки бир нечта турдаги ресурслар ҳақида эмас, у ерда нодир металларнинг жуда улкан захиралари мавжуд», — деди у элчихона томонидан эълон қилинган матбуот анжуманида.
Хитой омили ва дипломатик мувозанат
Жули Стаффт Хитойни Қозоғистон бозоридан «сиқиб чиқариш» ҳақидаги фикрларга аниқлик киритар экан, мамлакатнинг Хитойга бўлган боғлиқлигини камайтириш ҳақида гапирганига шубҳа билдирди.
«Менинг мақсадим — АҚШ ва Қозоғистон ўртасидаги ҳамкорликни кенгайтиришдир. Биз Хитой қўшни давлат эканини ва у Қозоғистон билан улкан савдо алоқаларига эгалигини тушунамиз. Қозоғистоннинг асосий савдо ҳамкорлари кимлигини билиш учун Google’дан қисқа қидирув беришнинг ўзи кифоя — АҚШ бу рўйхатда ҳали юқори ўринларда эмас. Умид қиламанки, қачонлардир бунга эришамиз, аммо ҳозирча вазият шундай», — деди дипломат.
