«Nvidia» раҳбари сўнгги лаҳзада Трампнинг делегациясига киритилди
Бу хабар ортидан СИ-чиплар бозори етакчиси бўлган «Nvidia» акциялари 2 фоиздан ортиқ қимматлашди. Хитойдаги СИ-компаниялари акциялари нархи ҳам кескин кўтарилди.
© Getty Images«Nvidia» раҳбари Женсен Ҳуанг сўнгги лаҳзада Доналд Трампнинг Хитойга йўл олаётган делегациясига қўшилди. Делегация Си Жинпинг билан музокаралар ўтказади. Бу ҳақда компания «Nikkei Asia» сўровига жавобан маълум қилди.
Нашр ёзишича, топ-менежер президент самолётига чиқиш вақтида учиш-қўниш йўлагида кўрилган, кейинроқ эса Трамп унинг делегацияда иштирок этишини «Truth Social» тармоғида тасдиқлаган. Президент Ҳуанг ва бошқа бизнесменларнинг Америка делегацияси таркибида бўлишини шараф деб атаган. Инвесторлар бу янгиликни ижобий қабул қилди: «Nvidia» акциялари 13-май куни биржа олди савдоларида 3 фоиздан ортиқ қимматлашди, деб хабар берди «Bloomberg».
«Nvidia» маълумотига кўра, компания раҳбари Трампнинг шахсий таклифи билан саммитга қўшилган ва «Америка маъмурияти мақсадларини қўллаб-қувватлаш» учун сафарга чиққан.
«Bloomberg» манбасининг айтишича, АҚШ президенти Ҳуангга шахсан қўнғироқ қилган. Шундан сўнг «Nvidia» раҳбари Аляскага учиб бориб, режалаштирилган қўниш вақтида «Air Force One» бортига чиққан.
Аввалроқ энг талаб юқори бўлган СИ-тезлаткичлари яратувчиси таклиф этилган бизнесменлар рўйхатида йўқ эди. У ерда Илон Маск, Тим Кук ҳамда Кристиано Амон каби шахслар бор эди. Бу ҳолат матбуотда кенг муҳокама қилинган.
Экспертлар Ҳуангнинг делегацияда йўқлигини АҚШ ичидаги сиёсий баҳслар билан боғлаган. Хусусан, Вашингтон Хитойга илғор Америка чипларини сотишга рухсат бериш ёки бермаслик масаласида иккига бўлинган, деб ёзади «Bloomberg».
Ўтган ҳафта Ҳуангнинг ўзи ҳам бу ташрифда қатнашиш истагини очиқ айтган эди:
«Агар мени таклиф қилишса, бу мен учун катта шараф бўлади – президент Трамп билан бирга Хитойга бориб, АҚШни намойиш этиш мен учун улкан фахр».
«Nikkei Asia» таъкидлашича, Ҳуангнинг сафари Хитой бозорига СИ-чиплар етказиб бериш бўйича ноаниқликлар фонида кечмоқда.
2025-йил декабрида «Nvidia» катта лоббистик ғалабага эришган эди: Трамп экспорт чекловларини юмшатиб, компания маҳсулотларини Хитой компанияларига сотишга рухсат берган. Бироқ бунда АҚШ бюджетига 25 фоизлик бож тўлаш шарти қўйилган.
Аммо ҳозир етказиб беришларга энди Хитой ҳукумати тўсқинлик қилмоқда. Пекин ўзининг «Huawei» ва «Cambricon Technologies» каби ишлаб чиқарувчиларини ҳимоя қилишга интилмоқда. «Nikkei Asia» маълумотига кўра, Пекин «Alibaba», «Tencent» ва «ByteDance» каби маҳаллий техногигантлардан нега айнан хорижий процессорлар кераклиги ва нима учун маҳаллий ечимлар етарли эмаслиги бўйича батафсил изоҳ талаб қилмоқда.
Хитойдаги икки СИ-компания акциялари қимматлади
Женсен Ҳуангнинг Доналд Трамп делегацияси таркибида Хитойга ташриф буюриши маълум бўлгач, хитойлик икки СИ-модел ишлаб чиқарувчиси акциялари кескин қимматлашди. Инвесторлар Хитойнинг «Nvidia»нинг «H200» чипларидан фойдаланиш имконияти пайдо бўлиши мумкинлигини баҳолай бошлади, деб ёзади «Bloomberg». «MiniMax» ва «Zhipu AI» (расмий номи – «Knowledge Atlas Technology») акциялари мос равишда 18 фоиз ва 38 фоизгача кўтарилди.
«GAM Investments» фонд менежери Жиан Ши Кортесининг айтишича, «Zhipu» ва «MiniMax» акциялари, эҳтимол, Женсен Ҳуангнинг Трампнинг Хитойга ташрифига қўшилгани ҳақидаги хабарлар ортидан ўсмоқда. Бу хитойлик йирик тил моделлари ишлаб чиқарувчилари «Nvidia»нинг янада илғор чипларидан фойдаланиши мумкинлиги эҳтимолини оширади».
Унинг қўшимча қилишича, ҳозир инвесторларни биринчи навбатда СИ билан боғлиқ барча йўналишлар қизиқтирмоқда. «Nvidia» акциялари 13-май куни премаркет савдоларида 2,2 фоизга ўсди.
