Одамларни қул қилиб сотган Минг оиласининг 11 аъзоси қатл этилди

Хитойда Мянмадаги фирибгарлик марказлари тармоғини бошқарган Минг оиласининг 11 нафар аъзосига нисбатан чиқарилган ўлим ҳукми ижро этилди. Бу ҳақда «Синхуа» агентлиги хабар бермоқда.

Айбланувчилар 2025 йилнинг сентабр ойида қотиллик, одамларни ноқонуний қамаш ва фирибгарликда айбдор деб топилиб, ўлим жазосига ҳукм қилинган эди. Икки нафар судланувчи апелляция берган бўлса-да, Хитой Олий халқ суди ўлим ҳукмини ўз кучида қолдирди.

Оиланинг жиноятлари

Минг оиласининг жами 39 нафар аъзоси жиноий фаолият олиб боришда айбдор деб топилган. BBC га кўра, Минг оиласи Мянманинг Хитой чегарасига яқин жойлашган Лауккаинг шаҳарчасини бошқарган тўртта уруғдан бирига мансуб бўлиб, улар бу тинч ҳудудни қимор ўйинлари, гиёҳванд моддалар ва фирибгарлик марказларига айлантиришган.

Охир-оқибат, Мянма ҳукумати бу масалага жиддий ёндашиб, 2023 йилда мазкур оилаларнинг кўплаб аъзоларини ҳибсга олган ва уларни Хитой ҳуқуқ-тартибот идораларига топширган.

Фирибгарлик фаолиятидан тушган даромад

Хитой давлат телеканали CCTV хабар беришича, қатл қилинган 11 нафар аъзодан ташқари, яна беш кишига икки йиллик муҳлат билан ўлим жазоси берилган; 11 киши умрбод қамоққа ҳукм қилинган; қолганлари эса беш йилдан 24 йилгача озодликдан маҳрум этилган.

Суднинг аниқлашича, 2015 йилдан бери Минг оиласи ва бошқа жиноий гуруҳлар телекоммуникация фирибгарлиги, ноқонуний қимор ўйинлари, гиёҳванд моддалар савдоси ва фоҳишабозлик каби жиноятлар билан шуғулланиб келган. Уларнинг қимор ва фирибгарлик фаолияти 10 миллиард юандан (1,4 миллиард АҚШ доллари ёки 1 миллиард фунт стерлинг) ортиқ даромад келтирган.

Бошқа манбаларга кўра, тўртта оиланинг ҳар бирининг қиморхоналари ҳар йили бир неча миллиард долларлик маблағни айлантиргани тахмин қилинмоқда.

Одамларни қул қилиб, отиб ташлаган

Суд, шунингдек, Минг оиласи ва бошқа жиноий гуруҳлар бир нечта фирибгарлик маркази ходимларини ўлдириб юборишган. Жумладан, бир воқеада ишчиларнинг Хитойга қайтишига тўсқинлик қилиш мақсадида уларни отиб ташлашган.

Дастлаб Хитой ва бошқа кўплаб қўшни мамлакатларда тақиқланган қимор ўйинларига бўлган Хитой талабидан фойдаланиш мақсадида яратилган Лауккаинг казинолари вақт ўтиши билан пул ювиш, одам савдоси ва кўплаб фирибгарлик марказлари учун даромадли воситасига айланган.

БМТ бу ҳодисани «фириб пандемияси» деб атаган — бу ерда 100 мингдан зиёд хорижликлар, асосан хитойликлар, мажбурий меҳнат билан шуғуллантирилиб, бутун дунё бўйлаб қурбонларни нишонга олган мураккаб онлайн фирибгарлик операцияларини ўтказишга мажбурланган.

Минг оиласи бир пайтлар Мянманинг Шан штатидаги энг нуфузли оилалардан бири бўлиб, Лауккаингда камида 10 000 ишчини ушлаб турган фирибгарлик марказларини бошқарган. Уларнинг энг бадноми «Crouching Tiger Villa» деб аталган мажмуа бўлиб, у ерда ишчилар мунтазам равишда калтакланиб, қийноқларга дучор этилган. Ўғирланган одамлар қул сифатида сақланган ва ишлашга мажбурланган. Қочишга уринганлар эса ўлдирилган.

Тақдир

Қайд этилишича, оила бошлиғи Мин Сюечанг ўз жонига қасд қилган. Оиланинг бошқа аъзолари эса Хитой ҳокимиятига топширилган. Қатл этилганлар орасида унинг ўғли — Мянмадаги ҳарбий хунтага содиқ чегара қўшинларининг собиқ қўмондони Мин Гопин ва набираси Мин Чжэнчжэн ҳам бор.

Фирибгарлик марказларида ишлайдиган минглаб одамлар ҳам Хитой полициясига топширилган.