Ўзбекистон Афғонистондан кўмир сотиб олади
«Толибон» кўмирни Покистон ўрнига Ўзбекистонга экспорт қилмоқчи. Амалдаги ҳукумат асосий савдо йўналиши ўзгарганини маълум қилди.
Афғонистон кўмири бундан буён Покистонга эмас, Ўзбекистонга экспорт қилинади. Ўзбекистон кўмирнинг асосий харидорига айланади ва бунинг эвазига Афғонистонга юқори сифатли цемент ҳамда дори-дармон маҳсулотларини етказиб бермоқчи.
Бу ҳақда Балх вилояти ҳокими вакили Ҳожи Зайд маълум қилди. У Афғонистоннинг амалдаги ҳукумати билан Тошкент ўртасида янги савдо келишувлари имзоланганини хабар қилди.
Экспорт йўналишини ўзгартириш тўғрисидаги қарор Афғонистон ва Покистон ўртасидаги чегара пунктларининг ёпилиши ва савдо-сотиқнинг амалда тўхташи фонида қабул қилинган. Бу вазият «Толибон»ни қўшни мамлакатлар, айниқса Ўзбекистон ва Эрон билан ҳамкорликни фаол ривожлантиришга ундади.
Шу билан бирга, «Толибон» Молия вазирлиги Покистон билан савдонинг тўхтатилиши афғон савдоси ҳажми ва божхона тушумларига салбий таъсир кўрсатмаганини таъкидлаб, вазирлик муқобил йўналишларни ўзлаштиришда тадбиркорларга ёрдам беришини маълум қилди.
Айни пайтда, Покистоннинг «Dawn» газетаси октабр ойида Кобул ва Исломобод ўртасидаги муносабатлар кескинлашгандан сўнг Торкҳам чегара пунктининг ёпилиши Афғонистон ва Покистонга 4,5 миллиард доллардан ортиқ савдо йўқотишларига олиб келганини қайд этмоқда.
