Ўзбекистон тажрибаси БМТ комиссиясида тақдим этилди

БМТнинг Ню-Йоркдаги қароргоҳида Аҳолишунослик ва ривожланиш бўйича комиссиянинг 59-сессияси ўз ишини бошлади. Унда «Аҳоли, технологиялар ва барқарор ривожланиш шароитида тадқиқотлар» мавзуси муҳокама қилинмоқда. Бу ҳақда «Dunyo» АА хабар берди.

Ўзбекистон Республикаси Президенти ҳузуридаги Статистика агентлиги делегацияси мазкур нуфузли тадбирда иштирок этмоқда. Сессия 17 апрелга қадар давом этади.

«Ўзбекистон – 2030» стратегияси тақдим қилинди

Тадбир доирасида Ўзбекистоннинг демографик жараёнларни бошқариш ва рақамли трансформация соҳасидаги ютуқлари халқаро майдонда тақдим этилди. Делегация чиқишида таъкидланишича, мамлакат аҳолиси ҳозирда 38 миллион нафардан ошиб, 55 фоиздан ортиғини ёшлар ташкил этади.

Шу нуқтаи назардан, «Ўзбекистон – 2030» стратегияси доирасида инсон капиталига сармоя киритиш, хотин-қизлар ва ёшлар имкониятларини кенгайтириш давлат сиёсатининг устувор йўналиши сифатида белгиланган. Бу эса мамлакатнинг узоқ муддатли барқарор ривожланишини таъминлашга хизмат қилади.

Алоҳида қайд этилган жиҳатлардан бири — 1989 йилдан буён илк бор ўтказилган аҳоли ва қишлоқ хўжалиги рўйхатга олиш жараёнидир. Ушбу жараён илк марта тўлиқ рақамли технологиялар асосида амалга оширилиб, халқаро экспертлар томонидан юқори баҳоланди.

Шунингдек, Ўзбекистон вакиллари Аҳолишунослик ва ривожланиш бўйича халқаро конференция (ICPD) Ҳаракатлар дастурига содиқлигини тасдиқлади. Қайд этилишича, рўйхатга олиш натижасида олинган маълумотлар соғлиқни сақлаш, таълим ва бандлик соҳаларида манзилли қарорлар қабул қилиш учун муҳим асос бўлиб хизмат қилади.

Аҳолишунослик ва ривожланиш бўйича комиссиянинг мақсади ва вазифаси

Мазкур комиссия БМТ Иқтисодий ва ижтимоий кенгашининг асосий органларидан бири бўлиб, 47 та аъзо давлатни бирлаштиради. У демографик тенденцияларнинг барқарор ривожланишга таъсирини таҳлил қилади ҳамда 2030 йилгача бўлган кун тартибини мувофиқлаштиришда муҳим рол ўйнайди.